O maia, ia tatou alalaga fiafia i le Atua, ia tatou alalaga i le papa o lo tatou olataga. Ia tatou o atu i ona luma ma le viiga, ia tatou alalaga ia te ia i le pese o viiga, o le faafetai, o le faamanu ma le faaneetaga silisili i lona alofa le mafaatuaoia, lea ua mafai ona aulia manuia mai ai e le tamaitai o (LOGIF) LOVE OF GOD ICON F’LEAVA TANUVASAMANAIA IOANE SAVALI, le atoaga o lona tasi tausaga e pei ona sa faamanatuina ai i le Aso Toonai e nai ona matua o Ioane ma Paulele Savali Ioane, aemaise o nai ona matua matutua (grand-parents) le susuga i le faafeagaiga Rev. Savali ma Taito Faaleava Fenunuti Lilo Ioane, le paia ma le mamalu o le aiga Ekalesia i Magele, aemaise foi i latou na valaaulia, na fai ma molimau ma ave faatasi a‘e ai le loto faafetai i le Atua ona ua taunuu manuia le faamoemoe.
O se faamoemoe matagofie na tapenaina e tuaa ma nai matua o LOGIF aua na tulaga ese foi le faatinoga o le faamanatuina o le tasi tausaga o lenei foi tamaitai. Felanulanuai faafiafiaga aemaise o ni pese faapitoa sa saunia ma lagiina e uso o si ona tama, faapea foi le faletua ia Situa Tapua‘i Telima aua lava le faafiafiaina o le tamaitai o LOGIF i lona aso fanau.
Na mae‘a faafiafiaga ona faimeaalofa lea o le tamaitai e ona le aso mo i latou uma na fai o latou sao mo le faamatagofieina o lona aso, aemaise foi o le auvalaaulia ma nisi o tina sa malaga mai i Samoa na auai atu i le pati o le tasi tausaga o LOGIF.
Ona faaiu lava foi lea o le polokalame ina ua tali le sua a le auvalaaulia aemaise o le paia ma le mamalu o le aiga-lotu faatasi ai ma nai tauaiga uma o le tamaitai e ona le aso fiafia, ma faapena ai loa ona lululima ma faatofa.
Ia (LOGIF) LOVE OF GOD ICON F’LEAVA TANUVASAMANAIA IOANE SAVALI, o moomooga alofa ma faamanuiaga mo oe le afafine pele, ia le aunoa le tausiaga alofa a le Atua ia te oe ma lou tuputupu a‘e, ia e maua le ola maloloina ma le manuia.
Alofaaga o nai ou matua peleina o Ioane ma Paulele Savali Ioane, o ou aiga uma aemaise le aiga-lotu i Magele, ae faasilisiliina alofaaga e le mavae mo oe le afafine mai ou matua matutua, Rev. Savali & Taito Faaleava Fenunuti Lilo Ioane.
