(Faimalō Faleiva Tuilo‘a Tau)
E ui lava i se nuti momoia o loto ma agaga i le motusia faafuasei o le mafutaga mafanafana, peitai e leai sē failoto auā o faalavelave e ono maimau ai le soifua, o le emo lava o le mata. Ua moni ai upu o le Tusi Sa, o le soifua ma le ola o le tagata ua o se puao na ona iloa mai ma toe mou atu.
E ese le faigata o mafutaga e momotu faafuasei e leai se faatofa. Ae amuia le tagata e tausaafia i ana galuega i lalo o le la, e mou atu ona taimi ae olaola mea lelei na ia faia. Letioa a fetalai Iesu, ‘Le auauna lelei e ma le faamaoni, ulufale maia i le fiafia o lou Alii’.
E momoe ma manū ae sau mala e atiae, ua na o se foe e faaee i le tau fuafuaga a le tagata pe ana lē seanoa le finagalo o le Atua. E lei mafaufauina o toe taimi nei e faamuta ai le soifua galue o se tasi o toa malosi, o le Peresetene o le Mafutaga a le Logan Samoa Advisory Council i Logan, Tiakono o le Ekalesia EFKS, tagata galue faamoemoeina, tamā i totonu o le aiga sa faufautua i ai le tausi ia Uriana aemaise le nofoaalo.
O le Aso 5 o Fepuari na usufono ai le tofa ia Faimalo Faleiva Tuilo‘a Tau i le maota gasegase o le Princess Alexandra ina ua siliga taliiseu lava togafitiga a fomai i se faalavelave na
tupu i le falefaigaluega.
Na logo i tiga ma faanoanoaga aiga ma uo i se tala faamomoiloto ma na matuai faateia e aunoa ma se talitonu auā foi o le tagata e vae mo‘emo‘e ma galue malosi e pei ona lauiloa ai foi i totonu o Brisbane.
O le tofa ia Faimalo Faleiva Tuilo‘a Tau e mai Safotu i Savaii. Ae lei malaga ese mai ma le atunuu i tausaga ua mavae, sa galue i le ofisa a le Polenisia, galue foi i le ofisa o leoleo i le vaega o le C.I.P, o se Komesina foi
o leoleo i Aleipata.
O se tamā e lē faapito lona alofa i soo se tagata, e manatua foi e alaleo ona o lana tautua ofo fua i taimi o leitiofoni na te faafiafia le aufaafofoga e ala i ana taleni faimeamalie.
E ui lava ina misia le mafutaga ma le tausi ia Uriana ma le nofoaalo aemaise fanau a fanau, aiga ma uo, peitai e olaola pea ma manatua uiga tausaafia o lea tamā i loto ma agaga o le toatele.
Sa faia ona sauniga faaleaiga i le afiafi o le Aso Tofi sa taitaia e lana faifeau, le susuga ia Rev Parataiso Afaaso faatasi ma le lagolago sua a Rev Pevise Leo ma Rev Isamaeli Liaina.
O le toe aso o ona toe sauniga sa faataunuuina i le malumalu o le Ekalesia EFKS Southwest Brisbane, sa taitaia e le Susuga ia Rev Petaia Tuifao, faatasi ma nisi faafeagaiga EFKS sa fai sao, Rev Ionatana Faaiuaso, Rev Safiti Iupati, Rev Peniamina Tuifaasisina ma le faafeagaiga mai Samoa Rev Tanielu Apineru.
Talu ai e masani ona asia e lenei tamā ma le mafutaga le falepuipui, o lea sa auai le Pulega a le (BYDC) Brisbane Youth Detention Centre, le nofoaga nofo vaavaaia o tamaiti faatasi ma leoleo, faapea foi ona molimau le alii Pule o le BYDC (Glen Knight) ma ia ta‘ua galuega a Faimalo ua maua ai le sootaga a lea mafutaga ma i latou talu mai le 2008.
E iai nisi tupulaga ua magalo i tua ona o le finafinau o lea toa o le atunuu ma ua faamanuiaina ma faaiu aoaoga i le taimi nei.
Sa faaalia foi le valevale alofa ma faataunuuina faaaloaloga masani auā aso faapenei e tali ai le talaaao atu o le atunuu, tofutofusia le gogo ma si ana ia.
Na matuai faamalieina tagata uma i le fofoga taumafa sa tapenaina e le tofa ia Poulava Sam ma le tausi ia Lorna Matautia o le Uncle Sam’s Takeway.
Ia faamaise le Atua i le tina ia Uriana
ma le nofoaalo faapea aiga ma uo
loto faavauvau!
