O le soifua maloloina lelei ma le ola manuia o tagata Pasefika ma soo se tagatanuu, o le matafaioi ma le faamuamua lea o auaunaga ma le fesoasoani a le South Seas Healthcare Trust.
Soo se pepe lava e amata faaa‘oa‘o ona savali, e amata lava i le laa muamua e tasi, seia oo lava ina savali ma tamoe, leai ma se eseese ma le tau amataina o se tautua ma auaunaga.
E le taumate o se savaliga umi ma le faigata lea na asā e le South Seas Healthcare Trust i tausaga ua mavae, seia taunuu mai i le manuia o taumafaiga e pei ona iai nei, le tatalaina o le latou Ofisa autū fou, ua siitia nei i ai ana auaunaga i Otara i le Aso Faraile na tea nei.
O se tasi nei o auaunaga faalesoifua maloloina i Aukilani i Saute, ua silia ma le sefulu tausaga talu ona faavaeina ma tautua mo tagata Pasefika i totonu o Aukilani.
O le faatupulaia o le moomia o le faasoasoani e fitoi tonu i tagata Pasefika ma malamalama i manaoga o tagata taitoatasi aemaise i le faaaogāina o le gagana faapasefika e fesootai ai le aufaigaluega ma le mamalu lautele o le atunuu, o nisi nei o itu lelei e ese mai ai le auaunaga a le South Seas Healthcare Trust.
O nisi o ana auaunaga, e fesoasoani tele lea mo aiga Pasefika, i fautuaga tau i le soifua maloloina, le vaaia o fomai, o polokalame eseese e fautuaina ai nisi vaega o le soifuaga, e aofia ai le taumafa tapaa, taaloga faitupe, o polokalame faamalositino mo le fanau aemaise le faaitiitia o le tino puta, o polokalame faaleaoaoga o le soifua lelei o tagata lautele.
E mafai foi ona fesoasoani le South Seas e fesootai ma galulue faatasi ma nisi matagaluega a le malo mo fesoasoani lava mo tagata lautele.
O alo ma tama fanau lava o le Pasefika o loo faauluulu i ai lenei tautua ma o le toatele foi o le aufaigaluega, o alo Pasefika, e fesoasoani tele lea, i le gagana faaaogāina, e faafaigofie ai le auaunaga i le mamalu o le atunuu.
O le Aso Faraile i le faaiuga o le vaiaso, na tatala aloaia ai le nofoaga ma le Ofisa fou, ua see nei i ai le tautua ma auaunaga eseese a le South Seas Healthcare Trust i totonu o le taulaga faatau i Otara. E pei ona silafia, o le ofisa autū sa iai i Papatoetoe i tausaga ua mavae, ae ua siitia nei i Otara.
O se moemitiga ua leva ona fau ao fau po ma le naunautaiga ia vave mai se aso e tatalaina ai, ina ia faalautele ai le tautua. E pei o le upu masani, “o se faamoemoe ua taunuu, o le laau o le soifua lea”.
Talitonu o le lagona foi lea i lea aso, i le vaaiga sa maitauina, o le matagofie o le Ofisa fou e le gata i le telē o totonu, ua tele atu potu mo auaunaga ma le tautua a le South Seas, aemaise o le mamā ma le matagofie o teuga faapasefika, ae salani i foliga tausaafia o le aufaigaluega ma ona ofisa ulu aemaise o alii ma tamaitai fomai o loo galulue ma tautua ai.
Sa faatumulia le faamoemoe i le mamalu o le auvalaaulia, o faauluuluga o pisinisi, o uo ma paaga a le South Seas Healthcare Trust. Pei ona masani ai aso faapenei, e mua lava mea i matautu sa.
O le sauniga lotu na tatala aloaia ai le faamoemoe, na saunia lava e le faafeagaiga Susuga Rev Aotofaga Lemuelu Ekalesia PIC i Otara. Sosoo ai ma le pese amata, na lagiina lea e se tasi o alo Samoa, le alii pese lauiloa o Lapi Mariner. O le faafeiloaiga autu, na faafeiloai aloaia ai le mamalu lautele na auai, na saunoa i ai le alii fomai, o ia foi o le Clinical Director a le South Seas Health Care Trust, Dr Andrew Chan Mow.
Sosoo iai nisi o saunoaga o le aso, e aofia ai le tamaitai pule Ms Kasalanaita Puniani General Manager o le South Seas Healthcare Trust, faapea le saunoaga mai ia Dr Teuila Percival, Deputy Chair o le Trust.
O le saunoaga autū, o le afioga i le sui Minisita o le Soifua Maloloina, Hon. Tariana Turia na saunoa i le tatalaina aloaia o le faamoemoe, aemaise o se upu faamalosi e timai ma taiala ai le savaliga auā se lumanai lelei mo tagata Pasefika.
O nisi o sui o le malo na auai ma valaaulia i le faamoemoe, ua maualuga ai lea aso, e aofia ai le alii faipule o Mangere, Su‘a William Sio, o le faipule o le itumalo Maungakiekie, Pesetā Sam Lotu Iiga, Anae Authur Anae, ma nisi o sui auai.
Sa matagofie le faamoemoe o le tatalaina o le Ofisa fou o le South Seas i Otara ma na faaiu lava i nisi o faafiafiaga o siva ma pese na alo i ai le mamalu o le aufaigaluega a le South Seas Healthcare Trust, ae taualuga lava, i se taumafataga māmā e talamasineia ai foi le afifio atu o le mamalu o le ‘auvalaaulia ma le atunuu lautele na auai.
