Ua loa na faafofoga le toatele o Samoa i Sini nei i le mālie ma le mālū o le siufofoga o le alii pese iloga le afioga Toala Eteru o le La Oso, Evaeva, Ifilele ma isi aufaipese na iai Toala ae faatoa vaai toto‘a lea ma faalogologo sa‘o lava ae faafiafia lenei tamalii i taualumaga o le Sisigafu‘a na faia i Sini nei.
O le Lau Samoa lea e Peresetene ai se tasi o siufofoga iloga ia Alaalatoa Emani Alaalatoa na o latou valaaulia ia Toala Eteru e malaga mai mo lenei faamoemoe ma sa faatupeina e le Afioga Tauo Siaki Valu Toomata o le pule sili o le falemaliu o le Toomata Funeral Services.
Na malaga mai Toala Eteru i Samoa ma le tamaitai pule o le ofisa malaga o Leifiifi Travel Agent ia Sonnya Sanft-Ah Tune faapea Namulauulu Notise Tavu‘i. O le po muamua na faafiafia ai lenei tamalii o le Siva o le tutoatasi (Independence Ball) lea na faia i Liverpool ma o le tau o le ticket e $80 ae peitai e lei faafiti ai le atunuu i le toe faatauina faatopetope lea o a latou pepa ulufale i le taimi na iloa ai ua taunuu mai Toala.
Na faatumulia foi le foloa i le ausisiva i taimi uma lava e usu ai ana pese masani faamomoiloto na iloa ai i le La Oso, Evaeva ma le Ifilele. Na sosoo ai ma le avea o ia ma tama pese faapitoa i aso o Faleaiga ma Faafiafiaga Samoa i le aso malolo 9 o Iuni.
E ui o le toatele o aupepese na iai i lea aso na faatali uma tagata i le taimi e pese ai Toala Eteru. E oo lava foi i le tupulaga na fananau i Ausetalia ma Niu Sila na o latou patipati ma fiafia i faafiafiaga a lenei tamalii auā o se leo mālū toe suamalie upu o ana pese ua silafia e le atunuu.
I lana faafiafiaga mulimuli i le Aso Toonai 15 o Iuni i le Greyhound Hall i Yagoona na masii atu ai loa le mamalu o Samoa e lagolago se siva na faia e faafetaia ai foi le sao o lenei tamalii i le faamanatuina o le Fu‘a i Sini nei ma sa auai atu ai foi le Afioga i le Konesula ma lona faletua.
O lea foi Siva poo le social na tatala ai le avanoa i tauaiga ma uo auā nai siva Samoa e momolia ai o latou alofaaga i le alii ese ma le aumalaga. Sa molimauina foi le faatumulia o le Greyhound i tamaitai ma a latou uo tamaitai e gau o latou loto i fatuaga a Toala Eteru ma e lē gata i seleni na o latou foai e tauala atu i siva a Fono e lua ma le afioga i le Konesula ae faapea foi le tele o faaili na iai aemaise uo ma aiga.
O taimi uma foi na pese ai Toala sa vaaia le faatumulia o le fola o le falesiava auā e tele lava i pese aualofa ana pese.
I se faatalanoaga i luga o le FM89.3 i le Aso Lua i le aoauli 2pm-4pm. Na fesiligia ai e Leilua Jerry Uesele pe iai se alo o Toala Eteru e pese ma sa ia tali, “E toafitu la‘u fanau ma o tamaitai matutua o la e pese le isi i le tauvaga pese a le TV1 i Samoa o le Star Search a o le isi tamaitai o loo faauma lana faailoga tau fomai tausimai i le Iunivesite o Samoa.
O le taimi nei i Samoa o loo matou pepese i le falekalapu i Vaitele ua faaigoaina o le Moanalisa ma lo‘u afafine lea e pese i le Star Search.” E atagia mai o le a sosoo e le alo tamaitai o Toala Eteru le taleni a lona tuaa.
Ua tuua nei Sini e le aumalaga mo ni faafiafiaga i Perisipeni ma Melepone a o lei toe taliu mai i Sini ma tapena ai mo Samoa.
