Faamanatu 52 tausaga Tutoatasi o Samoa i Kuiniselani

O se aso e tuufaatasia ai tagata uma

I le segisegi o le taeao o le Aso Gafua, 9 Iuni 2014 na sisiina a‘e ai le tagavai o le saolotoga o le malo o Samoa i le ogatotonugalemu o Kuiniselani i le fitu i le taeao. Sa amataina i savali a Mafutaga eseese ma Ekalesia, Asosi, faapea foi ma le mamalu o le atunuu, e faailoa lo latou agaga atunuu ma le faamaopoopo ma le lagolago e ala ia latou savali faaaloalo a o mitiia e le la le susū o le taeao i le susulu manaia ole la.

Sa taimua mai e le failipu a Toga le latou savali faapea faaili pu a le Ekalesia Aso Fitu o le toe afio mai. O saunoaga autu o le aso na fai sao ai nisi o malo faaaloalogia aemaise le saunoaga matagofie a le Sui Komesina o Samoa i Ausetalia lea sa malaga mai Samoa.

O le taitai o le sauniga o le Aso Gafua o le susuga i le toeaina ia Rev Afoa Alapati o le taitaifono Ekalesia LMS Pasefika. O le faitauina o le talaaga o Samoa na fofogaina e le afioga ia Tauiliili Peseta Ata Malifa.

O le uluai faifeau EFKS i Perisipeni lea ua avea nei ma faifeau Penisone Manumalo Malolo ia Rev Samuelu Tu‘iai sa ia sisiina le tagavai o Samoa a o le Afioga ia Tauiliili Peseta Ata Malifa na sisiina a‘e le tagavai o Ausetalia, ae fofogaina vii e lua e Ioane sisters o alo o Ioane ma Nifo Ioane, a o tutulalai le atunuu e faailoa lo latou faaaloalo i malo e lua.

Toatele malo faaaloalogia, o taitai o mafutaga, matagaluega a le malo faasetete i Kuiniselani, Faifeau mai Ekalesia eseese, ma le tausala Samoa Ausetalia, faatasi ai ma le alo fusu tautaua o Samoa i Ausetalia Alex Leapai.

O le Mafutaga a le Samoa Tuufaatasi sa latou faafoeina le fu‘a o le 2014 e faamanatu ai le 52 tausaga talu ona tutoatasi Samoa. O le taitaifono Afioga Lemalu Taulapapa Roy Slade, sui taitaifono fetalaiga ia Faimalotoa Ioane Pale, failautusi Tofa Leautuliilagi Malaeoalii Sogialofa Vaa Leapai, ma le teuoloa Afioga Muliagatele Filipina Petelo.

O le fetalaiga ia Leautuliilagi Malaeaolii S, Vaa Leapai ma le tofa ia Talevu Koleta Galumalemana sa fai ma fofoga o le aso. O se fiafiaga foi i mātua i maota ma laoa, e ui ina lē auai ae na maua lava i le faafofoga i le tautua a le alaleo a le 4eb i le aso atoa.

Na amata i le manuia le faamoemoe faaiuina i le matagofie i le agalelei i le tapaau o le lagi. Lagiina le pese ‘Lota Nuu’ ma faaiu i le tatalo e le Toeaina Rev Tauaaga Mataafa ma ta‘ape ai ma le fiafia, Viia le Atua.

Sa maualuga foi le faamoemoe ina ua auai mai le Sui o le Malo o Samoa, lē o loo avea nei ma Sui Komesina a o tau tālia ai le faiga filifiliga a le Malo o Samoa i se sui o le Afioga ia Lemalu Tate Simi. Lea sa auai mai ai le Sui Komesina le Susuga Tuisamau Fata Brian Kaio.

O saunoaga faapitoa o lea Aso sa alo i ai nisi sa mafai ona tofia e le Laulau a Fono a le Komiti:
1. Afioga Tauiliili Peseta Ata Malifa –
Brief History of Samoa
2. Councillor Rusell Lutton –
Deputy Mayor of Logan sa fai ma sui o le Afioga i le Tamaitai Pulenuu sa lē mafai ona avanoa ona o nisi o tuatuagia faaleaiga sa auai iai
3. Susuga Fata Brian Kaio –
Deputy High Commission for Samoa.
Saunoaga faapitoa e fai ma sui o le malo o Samoa
4. Tofa Faimalotoa Ioane Pale –
(Sui Taitaifono) Presidential Speech –
Sa saunoa i le saunoaga faaperesetene o le Aso

Tama Tuai o Sanele i KuiniselaniTama tuai o le Kolisi o Avele i KuiniselaniAusivaSDA Pathfiners QLDFaafeagaiga ma faletua ma nisi o le auvalaaulia QLDRev Samuelu & Tima Tu‘iai, faafeagaiga Manumalo sa sisiina le fu‘a ma alaluaina le keke o le 52 tausaga, Rev Elder Tauaaga Mataafa mase tasi o malo faaaloalogiaFaafiafiaga a le Iunivesite a Grifith sa faafiafia i le Tutoatasi o Samoa i Kuiniselani