O le tasi lenei o vaega tāua o le Fono Tele a le Ekalesia Faapotopotoga Kerisiano Samoa i tausaga taitasi pe a usuia.
O le molimauina ai o nisi o auauna a le Atua ua mae‘a ona faauu mai i Malua, ua mae‘a foi ona tautua mo le uluai tausaga o le soifua faafaifeau ma faletua ae o lea ua agai atu loa i le galuega tumau o le avea ma faafeagaiga taulagi a le Ekalesia.
O le tausaga lenei o le sauniga ua faatuataia i le Maota o le Mafutaga a Tina o le EFKS i totonu lava o le lotoā i Malua. O lea ua faagasolo galuega o le Iupeli, le malumalu sa faapea ona faatino uma ai sauniga tāua nei. O lea la ua faatautaia ai le sauniga tele lenei i gauta o le lotoā. O le tumutumu ai o lea maota i le molimauina o le faauuga a faifeau e to‘a 12 ma o latou faletua. O i latou nei ua mae‘a le tausaga o tautua i le Ekalesia. E toalua faifeau e fai nei le faauuga i le faaiuga o le vaiaso ua maua afioaga ua tautua ai ma ua avea ma tausinuu ae o le isi to‘a 10, o loo galulue i totonu o galuega eseese a le Ekalesia e ala i le agavaa faafaiaoga i aoga maualuluga a le Ekalesia. E lē gata i lea o nisi o loo galulue i totonu o le Ofisa a le Ekalesia ma isi o loo galulue faafaiaoga i le Kolisi faafaifeau a Malua.
Na auai uma taitai o le Ekalesia Faapotopotoga Kerisiano Samoa i lenei sauniga i le taeao o le Aso Toonai aemaise o aiga ma uo, o sui o aulotu o loo galulue ai nei nisi. O le faauuga lenei e aloaia ai le avea o i latou ua mae‘a aoaoga mai i Malua ma faifeau Samoa e pei ona iloa ai le vaega muamua lea o le auaunaga faafaifeau i totonu o Samoa ma ona lala i fafo atu.
O le galuega ua faatino e le faifeau faauuina Samoa o le faatino lea o faamanatuga, o le mafai ona ia taitaia o sauniga o maliu faapea ai ma faaipoipoga ma papatisoga.
O faifeau ma o latou faletua ua faauu mai Malua 2014:
Aperaamo & Ann Tufuga
Asau/Salailua – Faasaleleaga
Apineru & Winona Fasavalu
Tanugamanono/Faatoia – Kolisi Faifeau
Malua
Atapana & Etevise Tupuola
Saaga Siumu/Levi Saleimoa – Falealili
Sisifo
Eric & Amata Mulitalo
Lano/Sagone – Aana
John & Fesu‘ea‘i Ah Honi
Leulumoega/Porirua – Niu Sila i Saute
Lealao‘o & Litia Polutea
Satoalepai/Afega – Itu-o-tane
Malotau & Sina Lafolafoga
Vaiee/Fasitoo-Uta – Falealili i Sisifo
Reupena & Vaipou Nofoaiga
Vaivase-Uta/Motootua – Faleata
Sauleone & Lipale Tanoi
Vaiusu/Tulaele – Faleata
Setefano & Maria Logovii
Salelologa/Lu‘ua Faga – Faasaleleaga
Tanuri & Sanaima Pesaeli
A‘ufaga/Alafua – Lotofaga, Lepa, Aleipata
Tupou & Luisa Tanielu
Fatausi/Siufaga Falelatai – Aana
