O se faguinu ua faaigoaina o le “Taxi” – o se igoa ua manatu le pulega i le afioga Taimalie Charlie Ah Liki e faamanatu ai le auaunaga na faatautaia e lo latou tuaa o Herman (Mani) Westerlund (Ah Liki) lea na atinae mai ai lava pisinisi a lo latou aiga i totonu o Samoa.
O le Afioga Taimalie o ia ma lona faletua ua faapea ona faatautaia le atinae o le faleoloa tele o le Farmer Joe, o le falegaosi ‘ava lea ua maua ai le fagu pia o le Taula ma le Sama ma le fale faguinu la lea ua faaopoopo i ai ae na amata uma mai lava i galuega na ta‘ua e Taimalie na mafai ona faatino ona o le faamaoni o lona tamā i lana taavale la‘u pasese na faaopoopo ma mafai ona faaaooga uma ai i latou.
O le uso o Taimalie le afioga Lemalu Ray Ah Liki o loo pulea le faletupe o le Samoa Commercial Bank, o le isi uso ia Faamausili Andrew Ah Liki e ana le kamupani faufale o le Bluebird Lumber lea foi e iai lona fale tele o faleoloa ma ofisa i Salelologa i Savaii.
O le isi uso o Lucky e fai lona foi faleoloa ma le kamupani faufale ma fau auala ae o isi uso o loo fai a la fale taavale (rentals) i Apia.
O tuafāfine, e aofia ai Maria Westerlund Hunter, o le tamaitai e iai le tomai faapitoa i le paluina o vailaau faafomai (Pharmacy) ma ua iai foi lona fale talavai ae o le isi uso o Louisa e fai lana faletusi e faatau ai soo se oloa faaofisa ma meaaoga ma le fale o tupe faamomoli o le Inkpatch.
O lenei fanau ua manino le maualuga o a latou taumafaiga i atinae o le atunuu ae o le faafetai lava lea ua ave i o latou tuaa i le taumafaiga mai o i latou uma. Sa ta‘ua e Taimalie, o le mafuaaga lea o le faaigoa o lenei faguinu i le “Taxi” e faamanatu ai pea lenei atinae na amata mai e lona tuaa ma maua ai e ia le olaga finau e fai pea lana aoga seia oo ina fai lava lana ia pisinisi.
O lenei oloa e pei ona saunoa i ai Taimalie, e lē gata ina gaosi lava i fale faapitoa ua fausia i lenei fanua, ae o le suavai o loo faaaogā, e puna mai i le manava o le eleele. O le itu lelei lea e pei ona ta‘ua e le sooupu o le kamupani, Ioata Tanielu, ona o le suavai manino ma mamā o loo eli mai i le manava o le eleele.
O lenei pisinisi i lona faatupega e na o masini lava ia o loo gaosia ai nei faguinu e $15 miliona tala Samoa lona tau aofai e lē tāea ai oloa o loo faaaogā e gaosi ai lenei fagu inu.
O fagu o loo gaosi ai le faguinu e aumai i Aikupito ma na saunoa le susuga ia Ray Faamau o le pule o le vaega o loo faagaioia le faatautaia o lenei oloa, ua mafua ona aumai mamao ona e lelei, anagata toe taugofie.
O le ituaiga faguinu lenei o loo maua i le 350 milimita ma le 660 milimita ma e $2 le tau o le faguinu laititi ae o le faguinu lapoa e $3.50. Na saunoa ai le sooupu ia Tanielu e mafai ona toe faafoi atu atigifagu i le latou falegaosi faguinu i lona tau e .20 sene i le tamai fagu ae .40 sene le atigi fagu lapoa.
I le tulaga i tagata faigaluega, na saunoa ai le afioga ia Taimalie, e mafai lava ona oo atu i le 200 le aofaiga pe a solosolo lelei, ae o le taimi nei e lata lava i le 80 tagata faigaluega ua mafai ona maua ai galuega i le fale.
Ina ua fesiligia Tanielu i le tulaga faatauvaga, ae na ia faaalia, o le a faia lava i le mafai e gata ai ina ia gaosia faguinu tofo lelei, faamalieina ai le mamalu o le atunuu. I le tilotilo agai i le lumanai, o loo iai le fuafuaga a le Pulega, o le a iai nisi o flavours eseese e mafai ona gaosia mo le “Taxi”.
E pei ona fesiligia ai le afioga ia Taimalie, pe o iai se naunautaiga i le faaaogāina o fualaau taumafamata e gaosi ai nisi flavours e pei o le kuava, mago, fa‘i, ae na ia saunoa e iai se taimi e oo i ai i le tulaga lea, e fuafua i le mafai e le ‘au faifaatoaga ona faamalie le manaoga.
O flavours o le fagu inu o loo mafai ona faatauina atu e iai le Cola, Orange, Lemonade ma le Raspberry.
