O le malaga mai a le Samoa A na manumalo ai i le Sydney Academy XV na maimoa ai foi nisi o le atunuu i Sini nei i le taaalo a Michael ma Allan Alaalatoa mo Sydney.
O lenei auuso o alo o Gisa Vili Alaalatoa le pou muamua a le Manu Samoa. E taaalo uma Allan ma Michael i Sini nei mo West Harbour ma o le alii matua ia Michael na taalo i le aufili a Samoa i le luasefulu(U-20) tausaga lea na siamupini i le pulu lona lua o le Ipu a le lalolagi i le 2011.
O le ‘au lea i le 2011 na faiaoga ai Soifua John Schuster ae taitaimalaga ai Namulauulu Sami Leota.
Na taaalo ai foi Talaga Alofipo, Patrick Faapale, Robert Lilomaiava lea ua i totonu o le Taitoafitu faapea Oneone Faafou o loo i le Samoa A.
O le isi alii Samoa o loo toatolu ma Michael ma Allan i totonu o le Sydney Academy XV o William Skelton i le loka. O William Skelton foi na iai ma Alaalatoa i le aufili U-20 a Samoa.
O se alii o loo vaavaai i ai le Waratahs i le talavou toe maualuga mo le laina i luma. E 203cm le umī o Skelton ma a filifilia e le Waratahs ua faailoa mai o le tama taalo aupito tinoese lea o le a taalo mo NSW.
O le mamafa o Skelton e tusa ma le 136kg le mamafa. O le alii laiitiiti o Allan Alaalatoa e taalo i le laina i luma ma o loo mataituina e le Waratahs auā ua amata fai ifo le agavaa o le hooker iloga ia Tatafu Polota Nau.
E le gata i lea o loo lavea pea i le polokalame atiae a Sini ma Niu Sa Uelese auā le lumanai.
O le amataga o le tausaga nei na valaaulia ai Michael ma isi tama talavou e toasefulu e le faiaoga o le Waratahs ia Michael Cheika e koleni faatasi ma le ‘autele e tapenapena ai pe ono filifilia faafuasei mo le Waratahs i le tausaga nei e fua i tama manunu‘a.
