E lē o alu ifo i lalo le numera o solitulafono o le gaoi i totonu o fale faigaluega ma kamupani e oo lava i auaunaga eseese a le Malo. O le molimau a leoleo o se isi lea o solitulafono e lē o ‘asa se vaiaso ma lipotia atu mo le faia i ai o ni suesuega.
E eseese lava mafuaaga e fesootai ma lenei solitulafono petai e mamafa lava le pogai e mafua ai i le tele o mea eseese ua manao i ai e faatino ae ua vaivai le tamaoaiga. O le fautuaga a se tasi o tamalii ia faatāua le autu o le tala o le tupe a le Malo ua pasia nei e le Palemene, o le fua o le manao i le tupe ua e maua. E 12 afe tala se vaega tupe o loo agai i ai suesuega a leoleo na toesea mai i totonu o le kamupani gaosi ‘ava malosi o le Vailima i Vaitele. E leai se isi poo nisi ua taofia pe molia ona na faaalia e le sooupu o leoleo le susuga Su‘a Muliaga Tiumalu, o loo faagasolo pea suesuega.
O le tupe ua leiloa poo ua gaoia foi, e lē o mafai e le sooupu ona faailoa poo fea tonu o le auaunaga a le kamupani na masofa ai. Peitai o le a faatoa faailoa lea itu pe afai e oo le galuega a leoleo i le faia o ni moliaga ma tuuina atu loa i le faamasinoga.
Isi gaioiga faagaoi
E lē na o le pau lea o le mataupu tau gaoi o loo suesueina. O le kamupani o le Zeung Construction i Vailoa Faleata na gaoia ai ni uaea taugata, ae ua tofia ma molia ai ni alii faigaluega se toalua.
O se isi foi gaioiga mai se kamupani na toesea ai se moli sulu ae e lei molia ai se isi ona e lei mae‘a suesuega a leoleo. Faaalia e le sooupu, a fua i masina e lei mamao tele atu o lenei tausaga, o le tele lava o mea e gaoia o oloa ma seleni ae o loo aafia ai lava nisi o tagata sa faafaigaluega e ni pisinisi ma ni kamupani i le atunuu.
O lipoti foi o mea na tutupu i le vaiaso ua tuanai o loo faailoa ai e leoleo le taofia ma molia o se taulealea i lona faaulufale i Samoa o ni vaega o mea faitino ma le faamoemoe e gaosia ai le pauta faasāina o le ‘aisa.
Na aumai ia vaega i se pusaoloa poo se container lea e faapea na maua ai foi ma ni ‘aupega o laau malosi. O le amataga o le vaiaso na tea nei na maua ai lea pusaoloa ina ua taunuu i le uafu i Matautu ma na maua ia vaega ina ua sueina e le ofisa o le tiute ma logo ai loa leoleo.
Ua faalogoina pea i tala salatua le saoasaoa o le faaaogāina o lea pauta faasāina e nisi o le atunuu aemaise o le aafia ai o ni tagata i le aumaia i Samoa ma faatau atu.
Peitai e lē o solomuli ai le vaega o le tiute ma leoleo i le mataituina o le ulufale mai o tagata mai fafo aemaise o uta o oloa eseese ina ia mafai ona malupuipuia le sao mai ai ma ni faiga solitulafono tau laau malosi ma pauta ma laau faasāina.
