Na pei e ata ea pe ita le tamaitai Premier a Kuiniselani ina ua faateia i le vaveao o le aso 29 o Aperila a o sauni atu ma lana avetaavale e tulioso i le taavale e sauni sana asiasiga i Grantham.
Ae ina ua oo atu o loo tu mai na o lana Limo i luga o le palapala ua leai uma ni pa‘u e 4, ua oo i ai se faalepopoi o se tagata.
O le taavale faalemalo o le ituaiga o le Luxury Holden lea e faaaogāina e tagata mamalu o le malo sa paka i fafo o le maota o le tamaitai o Ana Bligh i Brisbane i Saute.
Na ripotia lenei faalavelave i le ofisa o leoleo ma e oo mai i le taimi nei e lei maua lava le ula na faia lea gaioiga.
O le tau atoa o nei pau taavale e tusa ma le 3 afe, ma ua mae‘a foi ona tuuina atu i le ofisa inisiua mo le toe auina mai o nisi pa‘u taavale fou.
I se faamatalaga mai le ofisa o leoleo e faapea e lē o mautinoa poo silafia e le ula na ia faia ia tulaga, o le taavale na oo i ai lona toatamai, o le taavale a le Premier le tamaitai o Ana Bligh. E sola lava le amioleaga ae tuliloaina, e feoloolo foi sina vaega o le faamanuiaina ai si maula lea pe a maua.
O se isi foi taavale a le malo na tulai ai se isi osofaiga muamua o le 2006, lea na gaoia ai foi se taavale, ae maua ane o le taavale a le ofisa o aoga.
Ia e lelei lava le fai ma le mautinoa ona sauni lea i ai i lona iuga, ae leaga le fai ona o se fia mālie ae lē o se gaoi faaataata.
O le isi fautuaga foi i nisi o faafitauli o tutupu pea ia i latou foi nei e latou te tasoaina taavale a isi i ka paka ma nofoaga faitele ae lē o mafai ona iloa atu e lē ona le taavale, e manaia lava afai e maosia le taavale a se isi ia te oe, e lelei ona faailoa i si na foi tagata nai lo le lavea ae sola.
Faamata a oo ina tupu ia te oe o le ā ea sou manatu ma sou lagona? E te lagona ea le tiga? Faamolemole e faafautuaga ae talosia e lē o tupu i nai o tatou tagata lea tulaga e pei ona tau aafia ai nisi o nofoaga.
