Mai i le taimi na taunuu atu ai i le Fale Faamasino seia mae‘a le tolaulauga o lona faamasinoga, e lei ea i luga le alii Letogo lea ua molia nei i le fasioti tagata faamoemoeina ona o le faalavelave lea na maliu ai se alii na faapea o le a faauu i tofi faafaifeau i le Fono Tele a Malua lea faato‘ā mae‘a atu nei.
O le alii o Faaesea Opetaia Liu na faafuseia lava le maliu ina ua osofai e ni tupulaga i Vaoala a o toe taliu e agai i lo la aiga ma lona toalua i Vaoala.
O lea la ua valaauina le tuuaiga lenei ua faia faasaga i le toatasi o ia taulelea i luma o le Faamasinoga Maualuga.
O le taulealea ia Valaulu Alosio Amituanai mai le afioaga o Letogo lea ua faamautu lona teena o le moliaga ua faia nei e Leoleo faasaga ia te ia.
O le faalavelave e pei ona silafia lea na tulai mai i le amataga o le masina nei i le afioaga o Vaoala, ua tuuaia ai Valaulu i le osofai o le alii Aoao i ni maa ma mafua ai lona maliu.
E lei au lenei alii i le maota gasegase i Motootua ona o le tuga o manu‘a i lona ao. I le tetee ai la o lea alii i moliaga, ua poloaia ai e le Faamasinoga ia nofo pea i lona aiga i Letogo ma aua ne‘i toe alu i Vaoala pe nofo i se nofoaga e latalata atu i lea nuu seia toe poloaia e le Faamasinoga.
Ua faatonuina foi lenei taulealea e faaoo uma ifo ana pepa malaga i le Ofisa o Leoleo ae o le a faaauau pea le tatalaina i tua o ia seia toe faia se isi faaiuga a le Faamasinoga.
Ona o le tumau ai pea o le tetee a lenei alii, ua faatonuina ai foi e lana afioga i le Faamasino Sili, le afioga ia Patu Tiavaasue Falefatu Sapolu, ina ia faia se loia e tulai mo lana itu ona o le matuia tele o moliaga faasaga ia te ia.
Ua toe tolopoina nei le faamasinoga o Valaulu Alosio Amituanai i le aso 24 o Oketopa o le tausaga nei mo le tolaulauina o ona moliaga.
