E ui o le mae‘a o le taaloga ma Falani e 22 i le 14 a le Manu Samoa, ae na silasila uma le lalolagi i le faaletonu o le alii laufali Aialani ia Shane Lacey lea na faafoeina le taaloga faaiu a le Manu i lana taamilosaga.
E oo lava i tagata Falani na faaali o latou manatu i luga o le Sky Sport na talitonu o le faaletonu o le laufali na mafua ai le toilalo o Samoa.
E lei umi na amata ae sikoa David Lemi i le minute lona fitu mo ‘ai o Samoa 7-0. O lea gaioiga matagofie na amata mai i se pasipasiga a le Manu na oo atu loa i la latou pou ia Census Johnston nofo kiki kalapa i le tulimanu ma faliu atu Falani faapea ua pe le polo ae peitai na po mai i totonu e le uigi talavou ia Robert Lilomaiava ma emoemo atu ai loa David Lemi le uigi saoasaoa o ia foi o le kapeteni i lalo o le pou.
Na taufao sikalamu i le ‘afa muamua fua i sala na lafo e le laufali i ‘au e lua, ae tusa ma le minute 20 talu na amata ona osofai ai le Manu Samoa ma sauni ai Tusi Pisi e kiki le polo ae tuli e le laina i tua na faafuaseia le poloka a lana paga ia Frederic Michalak ma sokasoka atu ai le polo ma sikoa ai i lalo o le pou mo ‘ai 7-7. Na toe faasala le Manu Samoa ma faaopoopo ai ‘ai o Falani e 10-7 i le ‘afa muamua.
O le taaloga muamua lenei faapolofesa a le alii laufali ia Shane Lacey o Aialani ma e lei po se lilo i le tau faataitai o lana faafoeina o taaloga tāua tele faapenei. Na matuā iloga foi le malosi o la tatou toavalu pito i luma i taimi o sikalamu.
O le toatolu lusi ia Faasavalu, Ofisa ma Tuifua na matuā iloga le galulue malosi. O la tatou laina i luma ia Census, Avei ma Taulafo ua silafia lelei le taaalo a Falani auā o loo konekarate ai. E ui ina lavea Daniel Leo, ae na vaaia le tulai mai o Filipo ma Tekori.
Na mataina le amataga o le ‘afa mulimuli ina ua osofai le Manu ma iu lava ina sikoa ai Joe Tekori i lalo o le pou mo ‘ai e 14-10. O le taimi foi lea na amata tulitatao ai loa e le laufali ia Shane Lacey na o gaioiga a le Manu.
O le sipasipa o togi a Falani i polo i fafo, offside ma le kiliina o le polo na matuā mafatia ai le Manu. I se tasi osofaiga na semanu e toe sikoa ai George Pisi ae na ili le faaili ma faasala Pisi pe tusa ma le lima mita mai le laina.
Na tutusa lelei lea faaiuga a Lacey ma le laufali Wales lea na faasalaina David Lemi i le taaloga ma Aferika i le 2011 e ui na iloga lelei e lē o se sala.
E ui ina toe sui atu isi tama i totonu ae na sosoo sala na matuā fiu le kapeteni ia David Lemi e fesiligia Lacey aepeitai na o le faataligatuli ma savali i tua o le alii laufali Aialani.
Na mautinoa foi le sosoo o sala e tolu a Falani i le sefulu minute faaiu na lepeti ai soo se ituaiga osofaiga a le Manu.
Na utagia e ‘au uma o le Manu e uma lava le taimi ae toe osofai lava ma manumalo. E uma le taimi o tumau pea le sikoa Falani 22-14 ma e fitu sala a Samoa ae tasi Falani. Pau le manumalo faalemafaufau na iai o sikoa e lua na maua e David Lemi ma Joe Tekori i le tasi laki a Falani.
