O lagona faafetai i le Atua ma le fiafia na aofia ai sui uma o le aiga faaleagaga ma aiga uma o le Faafeagaiga, Susuga Pastor Lui Ponifasio, ina ua faasolo le polokalame o le faauuina ma le faatautoina o lana susuga e tusa ma le galuega ua faaee atu nei ia te ia, ma ua avea ai nei o se faifeau mo le matagaluega o leoleo i le itumalo o Manurewa i Aukilani.
O se mitamitaga sili ma le faagaeetia o loto ona o lea foi ua ofi atu ma ua filifilia lenei auauna e ofoina lona soifua faafaifeau ma lana tautua faaleagaga e auaunaina ai le finagalo o le Atua i loto ma finagalo o alii ma tamaitai leoleo, ina ia mafai ai ona ogatasi le faataunuuina o a latou tiute ma le pa‘i atu o se galuega tala‘i i le finagalo alofa o le Atua e fai ma vailaau e gausia ai amio ma faafitauli o le galuega faaleoleo i tagata latou te fetaiai.
O se sauniga matagofie tele na molimauina e le toatele na auai o sui o le matagaluega o leoleo mai Manurewa, o faifeau o itumalo (police chaplains) o Howick ma Magele, o sui o le malo ma le Council, o le afioga i le Konesula Samoa i Aukilani, o tauaiga o le faafegaiga ma lona faletua ae sili ai le mamalu ma le paia o lana aulotu, le Life Church i Manurewa.
Saunoa le taitai o le sauniga, e tusa ma le 55 lotu eseese ua ofoina atu taimi o a latou faifeau auā le fesoasoani i le galuega a alii ma tamaitai mamalu o le malo ina ia sologa manuia pea le faataunuuina o tiute i aso uma.
O le matafaioi la a faifeau ua ofoina atu nei lo latou soifua mo lea faamoemoe tāua, o le tomatauina, lagolago, fesoasoani ma faaoloaina alii ma tamaitai leoleo, i le silisiliese ma le matautia o le alofa o le Atua ma ana galuega mamana, e oo atu ai i le faatinoga ma le faataunuuina o le a latou galuega ma tiute.
Aemaise ia oo atu ai foi le finagalo o le Atua i tagata lautele ina ia faaolaina ma avea ma meafaigaluega a le Atua i soo se ala e finagalo i ai le Atua, ma fulitua ai i amio, o tu ma aga o loo soifua ma mafua ai ona faia amio sese, poo le afaina foi o leoleo i tulaga pagatia i le taimi o a latou tiute.
Na faaalia le agaga fiafia ma le faafetai o le susuga ia Lui Ponifasio e tusa ma lenei auaunaga ua faauuina ai nei o ia aemaise o lona valaauina ina ia tala‘i atu pea le finagalo alofa o le Atua i soo se tagata.
Na maua foi le avanoa o le afioga i le Konesula Samoa i Aukilani, Afioga Faolotoi Reupena Pogi, e saunoa ai ma ave le faafetai aemaise o le faalaeiau i le faifeau, e tusa ma lona soifua auauna ua ofoina atu mo lenei faamoemoe tāua, e ui lava i le tele o nisi foi ona tiute o loo tautuaina ai le atunuu ma tagata lautele.
Ia o faamanuiaga ma le loto fiafia e faaoo atu i lau Susuga Lui Ponifasio. Ia sagai ane ‘ai o le finagalo alofa o le Atua, e fai ma taiala ma tapasa o lau galuega fou.
Ia saga faatumuina lau uto ma faatamaoaigaina lou finagalo faaleagaga e le mana o le Atua, ma ia faatumauina lau mafutaga ma lou Atua e maua ai malo mo le feau ma le galuega ina ia maua ni agaga se tele mo le malo o le Atua. Ia manuia tele ou laasaga uma; o ou mamā na!
