Ua iai nei se maliega ua maea ona auautasi i ai le Iunivesite o Samoa ma le Manukau Institute of Technology o le a faamanuiaina ai tagata Samoa o loo iai i Niu Sila nei ae faapea foi i lo tatou atunuu i Samoa. O lenei maliega e pei ona faailoa mai i le pepa o faamatalaga mai le aoga i Niu Sila nei, ua taua ai se feiloaiga na auai mai ai sui mai le Iunivesite o Samoa i le vaiaso na tea nei ma sainia ai se maliega e galulue faatasi ai (Memorandum of Cooperation). O lenei maliega o le a faamau ai se tautinoga mai le MIT ma le Iunivesite i Samoa, o le a galulue faatasi mo se taimi umi mo se lelei o tagata Samoa faapea foi ma le aufaigaluega o loo i Niu Sila nei ma Samoa foi.
I lalo o lenei maliega ua malilie ai e faapea:
• o le a amata ona faalautele le faailoga o le Bachelor i mataupu tau Samoa i le MIT
• o le a faia se polokalame fefaasoaai e feoai ai tamaiti aoga ma faiaoga i Samoa ma Niu Sila
• o le a faalauteleina le tomai o le aufaigaluega i vaega eseese e aofia ai le tomai i ‘ea malulu’ ma ‘pusa aisa’
• o le a faalauteleina le silafia i le vaega o maligi ma aoaoga pupuu e faia i Samoa i le Iunivesite i le 2010
Faailoa i se saunoaga mai le ofisa sili o le MIT, Dr Peter Brothers, o se fuafuaga taua tele lenei ma aoga mo le faalauteleina o le tomai i aoaoga maualuluga faapea, ma o le faataotoina foi lea o se alafua mo tupulaga Samoa i le lumanai e le gata i Samoa ae faapea foi i Niu Sila nei.
