O le tasi lea pitolaau o loo agai i ai susuga i faafeagaiga o Ekalesia, o le taumafai lea ina ia aua ne‘i motusia le gagana Samoa e faaaogā e fanau laiti e tautala ai, auā o nei atunuu o loo malosi ai le gagana lona lua i le aoaoina ina ia faigofie ona fesootai tagata eseese mai atunuu o le lalolagi. Ae lē o mafai ai lava ona tuua le naunautaiga o faafeagaiga e lauga pea le upu a le Atua i le gagana Samoa ina ia taofi ai pea i measina a le atunuu.
O le Ekalesia Metotisi Te Atatu o loo tausi matagaluega ai le susuga i le faafeagaiga ia Rev Saua Matai ma le faletua ia Vevesi na latou faatinoina se polokalame i le taeao o le Aso Toonai ua mavae i le hall a le Awaroa i le itu i Sisifo o Aukilani.
O lea faamoemoe o se tofa na a‘e i le susuga i le faafeagaiga ma lona faletua ma faiaoga Aso Sa ina ia faatinoina se polokalame i le gagana Samoa e faamausali ai pea le iloa ma le malamalama o fanau i le faaaogāina o le tatou gagana. Ae lē gata i lea, o le silasila mamao i le lumanai o fanau i le tu ma le aganuu a Samoa e pei ona faatinoina.
Na faatumulia le hall lenei i aiga lotu o le Ekalesia faapea uo ma ē masani sa latou molimauina le sao o fanau a o iai i le faaiuiuina o galuega o le tausaga. O lenei polokalame sa faapito lava i fanau o le Aoga Aso Sa.
E tolu ni vaega na vaevaeina i ai lenei faamoemoe; Vaega 1 o Tauvaga Solo, lea e toafitu fanauiti mai le 2 tausaga i le 6 tausaga sa tauva ai. Vaega 2 o Tauvaga Lauga e toalua na tauva ai mai le 7 tausaga e oo atu i luga le 11 tausaga. Vaega 3 o Tauvaga Taleni, ae sa tatala le avanoa i soo se tasi ma aiga lotu e faailoa le taleni ma le meaalofa ua foai e le Atua.
O le susuga i le pule o autalavou o le sinoti a Aukilani i Matu ia Rev Ioane Leilua sa ia tatalaina le faamoemoe i le tatalo ona faatulima lea o Janet Tekori i le mamalu o Samoa ua potopoto i lea taeao. Na amata le polokalame i le latou pese Samoa e siitia ai le viiga o le Atua ma sosoo ai ma le sāsā.
O faamasino o lenei tauvaga na galulue ai le pule autalavou faapea le tamā o le galuega ae o nisi o fanau a le Aoga Aso Sa, sa fai ma fofoga o le aso, vaavaalua ma le peresetene o le aoga le susuga ia Mauola Vaeono.
O vaega na togi agai i ai le Tauvaga Solo ma le Lauga, ia tausisi i le taimi, faaleoina o upu ma le auga tonu o le aso; o Taleni na togi i le tausisi i le taimi, maua lelei ma le foliga vaaia.
Na leai se taimaitiiti sa faaletonu le tapenaga i le faaleoina o upu ma le tausisi lava i vaega ua togi agai i ai le faamoemoe, e faapea foi i taleni na saunia lelei vaega uma aemaise ai o le tele o le ‘oa o meaalofa o loo tanumia e fanau, ae ua avea lenei polokalame ua lalaga a‘e ai i luga le faaaogāina o fanau, e pei o le taina o le ukulele, iliina o le pu faapea siva faitaga e pei ona masani ai tupulaga talavou i ona po nei.
Na matagofie foi siva ma tala mālie a le fanau na tova ai le polokalame faatasi ai ma le pisi o tina o le Ekalesia e serve le iputi ma fruits auā le fofoga taumafa o le auvalaaulia. O nisi sa faafaigata ona mafuta ma le ipu kofe, auā sa tapuai pea ma le toto‘a poo ai o le a sola ma faailoga, o meataulima Samoa ma le teutusi, a o nisi sa leai se popole auā o lea ua faanofo lelei e le sanuisi le loto.
Sa faapea foi ona sami ai ma sili a fanau sa tulaga muamua i vasega taitasi a le Aoga Aso Sa mai le Vasega PI e oo i le Vasega 10.
O le susuga Rev Ioane Leilua na tulai e tolaulauina togi. O tauvaga lauga na tutusa ai le toalua, o Tasilealofa Vaeono ma Ferila Utumapu. Na tulaga lua James Faiva ma Alfred Matai ma le tulaga tolu o Sanele Matai ma Tiaane Fesolai, ma le tulaga fā o Loyahl ma Honor Tuimaunei.
Tauvaga Lauga
(1 ) Sosene Toelau – lauga faafetai i le tamā o le galuega ma le faletua faapea faiaoga Aso Sa i le tofa mamao i le saunia o le faamoemoe.
(2) Pita Vaisagote – tautalaga e ala i le pule o le tautua, tautua toto ma le tautua matavela ae mulimuli ane ua to i ai le matupalapla.
Tauvaga Taleni
Na sola le alii laitiiti o Dantez Tiatia ma le tanoa ma le teutusi
Michael Vaeono
Anastasia Matai
O le agaga faafetai a le Peresetene o le Aoga Aso Sa le susuga ia Mauola Vaeono na ia faafetai ai i le mamalu o le auvalaaulia faapea le pule autalavou e tusa ai ma le lagolagoina o le polokalame, aemaise o le aao mafola na tauaaoina e le Aoga Aso Sa lea $2,985.60 le tupe na maua ai.
O lana faafetai faapitoa i nisi sa tuu atu lo latou tau‘au ma galulue faatasi e pei o le ASHES Superrette, Reuben & McGeachie Law, Well West Physio ma le University of Auckland.
