Galuega Faai‘u a le Samoa mo a Taeao

O le vaitau lava o feofoofoaiga i loimata o le fiafia ma lagona mitamita i loto o mātua ona o taumafaiga a fanau i totonu o a‘oa‘oga.
O le faatalitali a mātua i le tali mai a fanau e tusa ma le faatinoina o galuega sa faia na lagolagoina ai i latou i lenei tausaga atoa i soo se mea fai faalea‘oa‘oga aemaise o le matafaioi masani i aso uma ina ia fua mai i ni fua lelei ma logomalie.
O le Polokalame a le Samoa mo a Taeao o loo faauluulu ma taitaia e le afioga i le faletua ia Faimai Tuimauga, ma lona faufautua le faletua ia Malo Sepuloni aemaise le vasega o faiaoga. Sa faavaeina mai lenei polokalame tāua i le tausaga 2005 ma e faatupeina uma lava lenei faamoemoe mai le ofisa o Aoga.
O le sini autū ma le auna o lenei polokalame o le fia faaauauina lava lea o le faaaogāina o le gagana muamua a le tamaititi (gagana Samoa).
O se mitamitaga e viia ai le alofa maualuga o le Atua ona o polokalame lava nei o loo faatinoina e susuga i faiaoga, sa molimauina ai le faaeaina o nai fanau i ni laasaga maualuluga o a latou taumafaiga i totonu o faleaoga, e pei foi la ona sa faamanuiaina ai nisi o fanau i ni faailoga faapitoa e tusa ma tauiviga sa feagai ai i lenei tausaga.
O le polokalame a le Samoa mo a Taeao e faapitoa lava mo fanau ua lima tausaga i le sefulu tausaga peitai e toalua nai fanau sa faauuina i le polokalame ina ua tailima o la tausaga ma ua sauni atu nei mo le aoga tulagalua.
Manaia le polokalame na saunia lelei mo le fanau ma nai faafiafiaga ia ona faaiu foi lea i le taumafataga matagofie na saunia lelei ona taape ai lea ma le fiafia.