E silia i le luaselau le aofai o tagata Pasefika sa latou taupati ma faaaogāina aoaoga lē totogia sa faamatuu mai e le malo i le tausaga talu ai.
O ia avanoa ma aoaoga faapitoa e faatatau i tusipasi poo tipiloma mo le tulaga o pisinisi, aemaise lava nisi o loo fia amataina ma faatutū pisinisi mo le lumanai. O aoaoga sa ofoina ane e le malo, e aooga fua ai e leai se totogi, mo vaitaimi sa faatulagaina ai ia polokalame.
O le silia i le luaselau o i latou sa aoaoina ma faaaogāina, sa faamaonia o le fitusefulu pasene o tagata Samoa lava.
O se tulaga lelei ma le tāua tele ona o le maua ai o tomai ma agavaa mo le amataina o pisinisi, ae silafia ai foi poo ā ituaiga pisinisi o loo manaomia i le maketi mo le taimi nei ma le lumanai.
Sa faamaonia mai foi e nisi sa i le vasega Samoa, ma sa faaaogāina le nofoaga tutotonu o pisinisi i Otahuhu, le Pacific Business Trust e faapea, o le toatele o i latou o ni tagata matutua. Sa naunau ma tausinio ona o avanoa maua fua ma e tatau lava ona faaaogā tatau.
O le mau a nisi e faapea e tusa lava pe lē faia ni pisinisi, a o le maua o se isi agavaa fou e faaopoopo i le silafia e matuā tāua tele lea, aemaise lava e leai se tupe e faaalu ai ae o loo totogi uma e le malo. O le tau faaiu ai o galuega i le masina mulimuli o le tausaga talu ai 2010, sa faamae‘a ai ma faauuina i latou sa aoaoina i lea polokalame. Ua tauaaoina nei tusipasi o tipiloma mo le taimi muamua.
O se avanoa foi ua matala ai le isi faitotoa mo i latou e silasila toto‘a ai ma filifili pe toe faaauau le isi sitepu mo aoaoga i isi laasaga ma faailoga maualuluga. A o le a fai ai foi le filifiliga a nisi, pe o le a foi loa i le maketi e amata ma faatū se pisinisi ma faaaogāina le atamai ma le agavaa sa tauaveina ai aoaoga ma le tusipasi ua maua.
Sa ta‘ua e le toatele na faauuina, tagata Samoa lava e faapea, e manaia le aoaoina, e tāua foi le toe faalautele o le malamalama auā e lē toe maua se isi taimi, ma se isi avanoa e aoaoina ai lea ituaiga atamai.
O nisi foi ua mae‘a ona faavae pisinisi, ma sa fofoa lava i le poto ma le atamai masani sa soifua mai ai, ma le faasoa mai a le Atua e ala i meaalofa ma taleni.
Peitai sa molimau lava i latou e ui ina ua iai i totonu o le lio o pisinisi, a o le tautinoga lava e manaomia pea le aoaoina ina ia silafia nisi metotia e fesoasoani ai mo agai i luma ma le manuia o pisinisi.
Ua faamaonia foi i tautinoga ma saunoaga a le toatele o tagata Samoa, le leva ona iai o agavaa ma le poto masani i tagata Samoa lava.
Ona e fou nei aoaoga, ae ua leva ona faavae ma soifua mai i le soifuaga fai pisinisi a o iai i le atunuu, seia oo lava ina malaga mai ma alaala i Niu Sila ma isi atunuu o le lalolagi.
