E silia i le ‘afa miliona poo le $657,000 tala le tau o le fale koleni poo se Gym mo le Kolisi o Samoa i Vaivase. O se galuega na faatupe e le Asosi o Tama ma Teine tuai o le Kolisi ua lauiloa i le igoa o le SCOPA, le Samoa College Old Pupils Association.
O se galuega na fausia e se konekarate mai Saina lea na saunoa ai le alii Palemia susuga Tuilaepa L Sailele Malielegaoi i le saunoaga autu na tatala ai le galuega i le Aso Toonai na tea nei, ma ia faamanatu i le aofia na auai le faitioina o Saina e le taitai o le Itu agai ma lana itu, ae o lea ua ave le galuega i le konekarate mai Saina.
O le afioga Palusalue Faapo II le taitai o le Itu agai o se sui o le SCOPA ma o se sui foi o le komiti faafoe. O le saunoaga a le Palemia e faaatata lafoga na alu ai le taliē a le aofia, ae sa auai foi ma le taitai o le Itu agai ma le fofoga o alii poo le uipi a le Tautua Samoa le tofa Lealailepule Rimoni Aiafi o se sui foi o le komiti faafoe a le SCOPA.
O le fautuaga a le Palemia i alo ma fanau a le kolisi, ia faaaogā le fale koleni e faamalosi ai le tino ma tausi lelei ai le tino ia aulelei ina ia ola le mafaufau e maua ai le atamai e sailiili i mataupu o le aoga.
O le galuega sa tagi lava i lima ae na saunoa le taitaifono o le komiti o le SCOPA sa nafa ma le galuega le tofa Ulugia Fala Anamani, o lea sa futi le moa a le asosi ma le faamoemoe a totoe nisi mea ona futi faauma lea i se talosaga e ave i le Malo.
Ae na saunoa le Palemia ma ia faailoa e fiafia tele le kapeneta i se moa e futi ae totoe na o se fulufulu e tasi, ae a futi ae avatu e nao ni nai fulu ua o ese ae totoe le moa atoa e lei uma ona futi, ona faale lelei lea.
O le uiga o ia saunoaga o aitalafu o ni galuega faapea e lē mae‘a ona e masani lava ona tapa ai se fesoasoani a le Malo mo se fesoasoani tau seleni. O le galuega o le fale koleni e manino mai i le saunoaga a le taitaifono ua mae‘a e ui na saunoa le taitaifono a iai nisi mea o totoe ona saili lea o se laveai.
O le meaalofa a le vasega o Kolisi o Samoa mai le tausaga e 1972 i le 1976 na faailoa e le susuga i le faafeagaiga EFKS a Siumu o se tama tuai o le Kolisi le susuga Tu‘ia Peseta e $10,000.
Na foai foi e le uluai tama aoga ulu poo le head boy o le tausaga muamua na faatū ai le Kolisi o Samoa le afioga Afemata Tunumafono Apelu Aiavao lana meaalofa tupe e $1,000 tala, atoa ai ma se tasi o meaalofa tupe e lima e selau ma o ia meaalofa uma sa tauaao i le tofa Lealailepule Rimoni i le aso na umusa ai le galuega.
O loo iai le fuafuaga a le SCOPA e fausia se ofisa o le asosi e faia ai fonotaga a le komiti faafoe e aofia i le maota ua umusa ma o se isi lea faaopoopoga o le galuega i le fausia o le fale koleni.
O le afioga i le taitaifono aoao o le ekalesia EFKS susuga Tautiaga Senara na taitai i le sauniga lotu ae o le afioga Afemata Tunumafono Apelu Aiavao na ootiina le lipine. Sa auai le afioga i le Masiofo a le Ao o le Malo o Filifilia Tamasese o se tasi o faiaoga sa aoaoina le gagana peretania i le Kolisi o Samoa, a o avea ma faiaoga i tausaga e tele ua mavae.
Na faia faaaloaloga a le SCOPA mo malo valaaulia e ala i ni afifi o taumafa ma isi oloa poo hampers, o se suiga na faaalia e Lealailepule ua maua ai le faamāmā avega ae tausisia ai foi le mau tauave a le Malo ia maua le faamāmā avega i faalavelave fai o le atunuu.
