O le pitonuu o Goodna na faamanatuina ai le 24 tausaga o le Sulufaga a le Ekalesia Katoliko Samoa ua igoa o “Ioane le Papatiso” i le taeao o le Aso Toonai, aso 28 o Iuni.
Sa taitaia le sauniga e le afioga ia Patele poo Father Paul ma sa faatumulia i le mamalu o Samoa mai isi ekalesia Katoliko aemaise o le Divine Mercy sa auai.
Na logo malie viiga o le Atua na lagiina lava e le aufaipese siufofoga malie a le Ekalesia a Goodna, e pei ona taitaia e Laulu Teofilo Laulu, Sui Taitai pese o Semau Joe Masalu, Faipese o Maria Sagote.
O le Peresetene o le ekalesia o Nonu Ulutautogia Nonu, Sui Peresetene o Taituuga Ionatana Selave, Failautusi o Sefelina Vaoa, Teutupe o Kisa Tapusalaia Senio. O ē sa fai ma fofoga ole aso o Malo Apolonio Purcell faapea Auala Lemamea.
Na taualuga i faaaloaloga tu ma aga masani a le atunuu auā na faia le mea sili e le ekalesia e tali atu ai le maau ma le milomilosia e ala i le foai o le auvalaaulia. Na foi le gogo ma si ana i‘a auā ua fata luga fata foi lalo ua lē gata i le taumafataga manogi sasala, o palapala-a-malo, seleni paia ae salani i le laufofoga fiafia o le ekalesia Katoliko Samoa a Goodna, na teuteua le aso atoa.
Faamalo le galulue mo le auaunaga i le Atua ma Lona finagalo paia. Faafoi pea le viiga o le Atua ona o mea lelei uma o loo outou faia mo Ia. Manuia le 24 tausaga o le Sulufaga a le Ekalesia Katoliko Samoa i Goodna.
