Voice of Samoan People INC i Logan City
O le Mafutaga a le Leo o Tagata Samoa na uluai amataina mai i le 2009 ma o i latou foi nei na fai sao malosi i le faalavelave na tulai mai i ni alo Samoa lea sa maliu ai se tasi o alii apoliki poo se apolosini i lena vaitaimi.
E iai le tasi polokalame ‘anoa a le Mafutaga ua faaigoina o le Fue Felafoai, e silafia uma foi e le toatele le faauigaina o lea upu, e aoaoina ai manatu ma lagona i le aganuu a Samoa aemaise le faaaogāina o le gagana.
Ua tele foi nisi o alo ma fanau na soifua a‘e i nei atunuu ua faaoaina ai ma atamamai ai i le gagana Samoa auā sa tufi taufao ai manuia faaleaganuu. O le Aso Toonai aso 22 o Novema na faamae‘aina ai Polokalama fai o le tausaga 2014 a le mafutaga a le Leo o Tagata Samoa i Logan City (Voice of Samoan People Inc Logan City) Sa matuā faatumulia le Hall a le Hope Centre i Kingston i sui resitara faapea le mamalu o Samoa na auai ona o le fia maimoaina o ripoti faapea isi faamoemoe mo le tausaga 2015.
O le fetalaiga ia Leautuliilagi Malaeoalii Sogialofa Vaatausili Tuala Tamalelagi Leapai sa fai ma fofoga o le po, o ia foi lea o le Sooupu a le mafutaga, o le faiaoga foi lea o le polokalame i lalo o le faamalu a le mafutaga ale Leo o Tagata Samoa i Logan City.
O le sauniga lotu puupuu sa taitaia e le Susuga i le faafeagaiga ia Rev Isamaeli Lia‘ina o le Ekalesia EFKS i Logan City. O le Peresitene o le Mafutaga Faimalotoa John Pale, sa saunoa manino i le tulaga o le mafutaga ma le auga o le aso ona alo lea i le polokalame ma le taumafataga a o faafiafia le DJ, Timu Peniamina Fenunuti.
O le Polokalama autu o le faatinoina lea o nisi o vaega tāua sa faia i totonu o le Polokalama o Le Fue Felafoai (Samoan Cultural Program) – poo le molimauina o le Final Practical Assessment) e pei o le momolina o se faafeagaiga i sona nuu auā le galuega a le Atua, o le faatino o le siitu i se maliu (tausialii), o le faia o le faatau atoa ai ma isi vaega tāua o le aganuu a Samoa ae faasilisili ai e taulai mea uma i le alofa ma le agalelei o le Atua Soifua.
Sa matuā mataina se tasi o alii talavou sa fanau i Niu Sila i lona faatino o ia vaega uma Levaopolo Bruce Lauan.
E to‘a 13 i latou sa tauaaoina o latou tusipasi i le po anapo, o lea polokalama e faia i vaiaso muamua o masina taitasi ma e toe amataina i le amataga o le tausaga fou 2015.
