I le fonotaga a sui o le Matagaluega o le Soifua Maloloina ma le vasega ole aufaasalalau lipoti i totonu o le atunuu, lea na faia i le potu fono o le matagaluega i le fogafale tolu o le ofisa autu i Motootua i le faaiuga o le vaiaso talu ai, na saunoa manino ai le susuga Tagaloa Dr Robert Thomsen, ua mafua ona toe taumafai le Matagaluega e faia lana tau logologo, ona ua faateteleina le sasao faaafi o le faama‘i lenei.
Talu mai le masina o Iulai, Aukuso 2014 lea na amata pipisi ai i totonu o le atunuu lenei faama‘i, na amata mai ai foi ma galuega faalauiloa a le Matagaluega auā lava le taumafai e puipuia ma faaitiitia le pipisi o le gasegase lenei o le savali faanounou.
Saunoa le tofa Tuliau Dr Saine Vaai, o le galuega fai faatasi a le atunuu lautele ma le matagaluega, o le taumafai lea ina ia faamamā nofoaga e to‘a ai le suavai e ono mafai ona tau tuufua ai le namu. O le gasegase lenei e feaveai e namu, ma o ona auga o le tiga lea o ponaivi o le tino faatasi ma le niniva o le ulu. E lē gata foi i lea, o le alu faanounou lea o le tagata ua aafia ai.
E tele mataupu e pei ona faaalia e le Tamaitai Fomai Dr Tile Ah Leong e lagolagosua ai i saunoaga faalauiloa mo le faamoemoe e fesoasoani ai i le atunuu lautele mo le togafitia ma le faaitiitia o aafiaga o tagata lautele.
O le taimi nei e sili atu i le 2,500 tagata o le atunuu ua aafia. O le talitonuga o le Afioga Tuliau Dr Saine Vaai, e sili atu le numera o i latou o loo afaina i lenei gasegase nai lo i latou o loo iai i faamaumauga aloaia a le matagaluega.
Na faamanino foi e le afioga Tagaloa le 10 pito i luga o itumalo lea o loo pito maualuga le numera o ē ua aafia ma ua mafai ona oo atu i le falemai e saili togafiti. Ua avea lenei faama‘i ma auala o le fagufagu a le Pulega faatasi ma le Matagaluega i le ono oo atu lea o lenei gasegase i tagata uma.
Na faaalia foi e Tuliau e iai le manatu ua mae‘a ona tuuina atu se pepa i le Kapeneta e faataga ai se tupe mo le faatinoga o puipuiga o le faama‘i pipisi lenei.
