E 83,000 le aofai o le autalavou i le va o le 15 agai i le 24 tausaga le matutua e le o faigaluega poo aooga. O le vaega pito i sili ona maualuga i lea fuainumera o le 43.3% o tagata Pasefika i le va o le 15 agai i le 19 tausaga le matutua. O se isi faaupuga faigofie, o nei tupulaga e le o faigaluega, e le o i se aoga, e le o maua foi se penefiti, ae na o le nofonofo i le fale poo tafafao solo foi.
O le fesili e mafua aisea? A o le a se galuega a latou matua o fai i ai? Aisea ua le faaauau ai le o i aoga? O le a nei se lumanai mo latou pe afai e leai se suiga lelei? Afai e le o faigaluega ma ua le toe alu i se aoga, e le o latou nei ua faigofie nei ona faatosina i le taumafa ava malosi, poo le faia foi o amio solitulafono?
Lea ua taumafai nei le faigamalo a le National e amata faamalosia le unai o nisi o ia tupulaga o loo maua latou penefiti e o e saili ni galuega poo ni polokalame tau aoaoga.
O loo faasino tonu se tulafono taufaaofi a le Malo ia i latou o loo 16 agai i le 17 tausaga le matutua ma o loo maua se penefiti mai le Malo.
O le a le toe maua uma le aofai o a latou penefiti ae o le a faasoasoa e se isi vaega le faaaogaina o lea penefiti ina ia faamuamua le totogiina o pili masani e tatau ona totogi, ma ia taofi ai le faaaogaina o le penefiti i le faatauga o sikaleti ma le ava malosi.
E le gata i lea o loo faasino tonu lenei tulafono taufaaofi ia i latou ua iai se fanau poo “solo parent” ma o loo maua le penefiti mo matua taitasi o loo tausia ni tamaiti laiti (domestic purposes benefiti).
O soo se isi o loo maua le penefiti o le “domestic purpose” mo le tausiga o le fanau laiti, o le a faamalosia e lenei tulafono taufaaofi le alu o le matua e saili se galuega e latalata i le 15 itula (part-time) le umi – pe a atoa le 5 tausaga le matua o le tamaitiiti e pito i sili ona laititi. Ae e atoa loa le 14 tausaga o le matua o le tamaitiiti laitiiti ona faamalosia loa lea ona alu e saili se galuega e latalata i le 30 itula (full-time) le umi.
E le na o le autalavou e iai fanau e aafia i nei suiga. O le a aafia uma lava latou o loo maua le penefiti o le ‘solo parent; poo latou o loo iai fanau laiti – ma e leai se toalua – ma o loo maua le penefiti mo matua taitasi, poo le ‘domestic purposes benefit’.
O lea la ua mae‘a le faitauga muamua o lenei tulafono taufaaofi. Ua mae‘a foi le avanoa sa tatala mai mo tagata lautele e faailoa atu latou finagalo i le Komiti a le Palemene o loo nafa ma lenei tulafono taufaaofi.
O loo galue ai nei le Komiti a le Palemene e tusi lana lipoti i lea tulafono ma fofola loa lana lipoti mo le silafia a le Palemene aoao. E fofola loa lenei lipoti i le Palemene ona fai loa lea o le faitauga lona lua ma faasolo ai i ala o tulafono seia oo i lona faitauga lona tolu – ma palota loa pe pasia pe leai.
E ui o loo tetee i ai le Itu Agai i lenei tulafono taufaaofi, ae ua faailoa mai lava e le Malo ma ana faiga paaga o le a latou maua lava le fuainumera o palota e pasia ai lenei tulafono. Peitai ane i faalapotopotoga uma ma tagata taitoatasi sa faaalia latou finagalo i lenei tulafono taufaaofi, e leai lava se isi e lagolagoina lenei tulafono taufaaofi.
Na faailoa e le Human Rights Commission i le Komiti a le Palemene o lenei tulafono taufaaofi o se tulafono o loo manino lelei ai le faailoga tagata, ma e le o tutusa lea tulafono taufaaofi ma le tulafono o Aia Tatau a Tagata Soifua e pei ona afifi i le Human Rights Act ma le NZ Bill of Rights.
Ua manatu le Komisi o Aia Tatau o Tagata Soifua o lea tulafono taufaaofi ua faasalaina ai se vaega o le Atunuu o loo manaomia le fesoasoani. Sa le tatau ona faasalaina tagata ia, ae e tatau ona fesoasoani ia i latou nei.
Na faaalia le finagalo a le Children’s Commissioner o lea tulafono taufaaofi o le a aafia ai tamaiti i se tulaga faaletonu. Aua afai e taofi le peneifiti i tina poo tamā, faapefea la ona maua tupe e tausi ai tamaiti laiti nei?
E manatu le Komisi a Tamaiti e tatau lava ona ave e le faigamalo le faamuamua i le puipuiga ma le saogalemu o tamaiti laiti o loo i aiga o matua taitasi (solo parent), poo aiga e le o iai ni tagata matutua o faigaluega.
E le tatau i se faigamalo ona tuulafoai nei aiga o loo iai tamaiti laiti, aua o tamaiti e tatau ona puipui e faigamalo mai le ola matitiva, poo le ola e aunoa ma le avanoa i aoga poo avanoa mo le soifua maloloina. O tamaiti o loo puipuia e tulafono faavaomalo lea ua sainia e Niu Sila.
A o faalapotopotoga uma lava sa latou taufai tu‘i sui o le National i fesili poo fea o iai galuega lea o le a taumafai e unai i ai nei tagata? O le manatu a nei faalapotopotoga o lea na folafola e le Palemia le iai o le 170,000 galuega fou faaopoopo i Niu Sila, peitai ane, o lea lava o loo faatalitali le Atunuu poo afea e taunuu ai lenei folafolaga.
Pau le mea ua mautinoa e toatele tagata ua vaea mai galuega, ma ua silia ma le 260,000 le aofai o tagata o loo taumafai e saili ni galuega tumau aua ua le agavaa mo se fesoasoani penefiti mai le Malo.
