E sili le Puipuia i lo le Togafitia – Pei ona ta‘ua muamua le tāua o le fai o Uili a Mātua:
O le auna lava ia manatua, e sili le nofo puipuia i lo le togafitia. O le mea foi lena na ta‘ua ai ia tatou polokalame i taimi o i luma le taua o le fai o uili a matua, e faamatala ai mea e finagalo e fai, a o soifua mai ina ia aua ai le vevesi alo ma fanau i taimi e tutupu ai faalavelave ona o le lē nofo sauni.
E sili le Tusia i lalo o mea e Tutupu i le taimi e Tutupu ai:
Ona o le tele o mea o tutupu i o tatou tagata, ma lavelavea ai i le tulafono, o lea ua ou faaaoga ai le tatou column i lenei vaiaso e toe faamanatu atu ai tapenaga e tatau ona fai, ma mea e tatau ona nofouta i ai.
Ou te fautuaina lava le tusitusi uma o mea e tutupu ma teu lelei na tusitusiga, nei manaomia i se taimi o i luma.
A iai se mea e tupu i totonu o lou aiga, fale faigaluega, falemai poo totonu o le tou Ekalesia e te silafia e iu ina finau ai pe taumafai e sue poo ai e sa‘o i se taimi mulimuli, avane se pepa e tusi ai i lalo mea na fai i le taimi tonu lea e tulai mai ai se mea e ono finauina i le lumanai.
Avane se peni ma se pepa e faamaumau ai i lalo mea nei: O le a le faafitauli poo le mea o tupu lea e finau ai; o ai tagata o iai; o le a le taimi lea ma le aso; o a tala na fai; o ai na faia tala; afai o oe na tali, o le a lau tali?
Afai o se mataupu o feagai ai oe ma leoleo, o mea ia e ta‘ua i luga e tāua foi ona faaaoga e te tusitusia i lalo aua e ono tapa i se taimi o i luma ae ua galo ia te oe, ae o loo mautu tusitusiga. Manatua afai o se leoleo lea lua te faafesagai tapa lau fesoasoani mai se loia ae e te lei taliina fesili a leoleo.
Mediation – Taumafai e Soalaupule le Mataupu a o lei aveina i le Fale Faamasino:
E tāua tele le taumafai e soalaupule i tua mataupu e se Mediator lelei ma malamalama i uiga ma talitonuga o tatou Samoa, a o lei aveina le mataupu i le fale faamasino.
E tāua le faaaoga o le auala lea e taumafai ai e foia se faafitauli, a o lei oo i totonu o le fale faamasino. E tusa foi pe ua i totonu o fale faamasino, e mafai lava ona faatalosaga e taofi le faamasinoga, ae sei soalaupule pe maua ai se faaiuga pe leai.
E tāua le sue o se Mediator e malamalama i le iuga, lagona ma iloa o le Samoa. O le tele o Mediators e le malmalama i tulaga nei.
O le tele foi e le malamalama i le taua o le tausi o le va lelei o aiga ona o Samoa e tele aa o le laau, pe afai o se faafitauli i le va o le Samoa ma le isi Samoa.
E taugofie le mediation, ma e mafai ai foi e tagata o loo finau ma misa, ona fai se faaiuga e laua lava ia e malilie i ai, i lo faaiuga mai i faamasino.
Poo Faamasino, Loia, Leoleo – Tali i le Sa‘o, Mafaufau Muamua i lau Tali Faato‘ā e Tali ai:
E tāua lou mafaufau toto‘a i lau tali i se fesili, poo sa oe lava tala o fia fai, a o lei faia lau tala.
Afai o luga o le faamasinoga lea e fai ai lau tala poo e tali ai i se fesili, e tāua lou mafaufau toto‘a i lau tali e fai, a o e lei tautala. Aua ia e manatua o le tala i totonu o le fale faamasino, o le tala e fai ua uma ona e tauto e ta‘u le sa‘o i le Tusi Paia.
Afai e te le malamalama i le fesili, aua e te tali ae fesili e faamalamalama mai le fesili, ona faato‘ā e tali lea. Mafaufau lelei a o e lei tali. Manatua e te falepuipui pe a e tali i se tala pepelo ae ua uma ona e tauto i le Tusi Paia.
Afai o se leoleo lea e suesueina oe, tapa le card a le leoleo, ona e uuina lea, ia e iloa le igoa o le leoleo lea e te tautala i ai.
Afai o sau molimau o fai i le leoleo, aua e te tautala, ae saili se loia e fautuaina muamua oe faato‘ā e tautala ai.
A muamua e tautala ae mulimuli sue se loia, e leai se mea e mafai e le loia i ni tala ua uma ona e faia ma faamaumau e leoleo, pe afai na fai au tala ma lou maliega.
O le fesoasoani a le loia, o le ta‘u atu ia te oe au aia tatau i luga o le tulafono a o lei faia sau faamatalaga, ia e faalogo i le fesili, ma tali tonu le fesili ae aua le faia fua tala e le talafeagai, ma e lavelavea ai.
O se faataitaiga lea sa ou ta‘ua i se tusitusiga muamua, ma o lenei mataupu o lea ua i luma o le High Court. ae o le a ou otooto atu na o ni mea e faamalamalama atili ai le tatou mataupu lea e ta‘ua:
“Sa valaau mai le tina i se fesoasoani faaloia, ma sa ou alu sao loa i le fale ona o lo‘u popolega i upu na tau mai e le tina Samoa. Sa ou oo atu o iai leoleo. Sa vaai mai leoleo ia te au, o le Samoa, sa oso mai loa le leoleo taofi au ma fai mai e faasa ona ou alu i le fale o le aiga Samoa.
Sa ou aveina loa i leoleo lau card loia. Sa ou fesili i le leoleo e na te tau mai le tulafono lea ua faasa ai au ona ou alu e vaai lau client. E leai se tali a le leoleo. Sa ou alu loa i le tina, ae mulimuli atu leoleo e toalua. O le mea taua lenei e nofouta i ai. Fai mai le leoleo i le tina: “tali mai a‘u fesili, e taua lou tautala mai i le matou suesuega faaleoleo ona o lea matou te fia malamalama i le mea na tupu”. Sa ou taofi le tina e aua le tali i le leoleo.
(1) Sa ou fesiligia le leoleo poo le a le ala o le interview.
(2) Sa ou fai i ai e aumai se faamatala upu faasamoa e faaliliu upu i upu a le leoleo lea o le a fai i le tina Samoa.
(3) Sa ou faamanatu i leoleo, le aia tatau a le tina Samoa i lalo o le tulafono o le Bill of Rights, e faamalamalama i ai i le tina e se faamatalaupu Samoa.
(4) Faliu mai loa le leoleo ia te au fai mai ae a pe a ou faamatala upu. Sa ou tetee malosi i le leoleo. Sa ou fai i le leoleo e le o au o se faamatala upu, o au o le loia. Ou te lei aoga i se aoga faamatala upu, e tusa pe lelei lau faasamoa.
(4) Sa faliu le leoleo i le tama teine a le tina fai i ai e tago e faamatala upu i lona tina.
(5) Sa ou taofia le teine e aua na te faamatalaina upu a le leoleo i lona tina, e le o ia o se faamatala upu ua qualify i se aoga faamatala upu.
(6) Sa iu ina leai se interview na faia e leoleo ae toe o.”
Lapataiga: Aua le vave le talaoso i se leoleo, pe a faapea atu e aua e te popole, e na o se suesuega e fia malamalama latou i se mea sa tupu. A suesue loa e se leoleo, tasi lava lau tali: “Ou te Manaomia se Loia Faamolemole Faato‘ā ou Tautala atu ai.” E iai La‘u Aia e Valaau ai sa‘u Loia i le Tulafono o e Bill of Rights” Aua le oso tautala muamua faato‘ā tapa ai i se loia. E totogi e oe le loia e fesoasoani ae laitiiti mamao le tupe e alu i le fesoasoani i le taimi lea, i lo le molia o oe, iu ina e falepuipui sese ona o ni faamatalaga na e faia, e le sa‘o ae sa fai i luga o lou le malamalama poo lou fefe i leoleo.
E sili le puipuia i lo le togafitia.
