Fonotaga tuufaatasi ia tineia taaloga faitupe i Niu Sila

O aafiaga o taaloga faitupe i totonu o aiga ma tagata lautele, o le mafuaaga tonu lea o le faia o le fonotaga faaleaoaoga a Matagaluega ma faalapotopotoga eseese a le Gambling, e fefaasoaa‘i ai agavaa i ni auala e mafai ai ona faaitiitia taaloga faitupe ma ona aafiaga i totonu o Niu Sila.
O lea fonotaga sa faia mai i Aukilani nei mo aso e tolu, sa faataunuuina lea i le Waipuna Lodge i Mt Wellington, pei ona masani ai, e ta‘i faalua ona faia i tausaga taitasi.
O nisi o nei auaunaga e aofia ai faalapotopotoga o loo agai tonu le latou fesoasoani faapitoa mo tagata papa‘e, Maori, Asia aemaise o le Pasefika ma ē eseese foi pitonuu o Niu Sila o loo tautua ai, e aofia ai matagaluega mai Invercargill, Dunedin, Christchurch, Hamilton, Wellington, Whangarei, Aukilani ma nisi vaega o Niu Sila.
O Matagaluega tuufaatasi a le Mapu Maia Gambling Foundations, Tupu Services ma le Southseas Healthcare na momolia le feau tuufaatasi mo se leo o tagata Pasefika i le fonotaga na tea nei, i auala o loo faatinoina ai le latou fesoasoani mo tagata Pasefika e fitoitonu lava i aafiaga o taaloga faitupe o loo aafia ai aiga Pasefika.
O se tasi o nei auala, e pei ona saunoa i ai le sui o le Mapu Maia, Rufo Pupualii, o ia na fai ma sui o matagaluega nei, o le avanoa lea sa tuuina i le fanau laiti e ala i le auaunaga a le Radio Samoa, e faia ai se tauvaga tusiga solo ma pese i luga o le leitio, e faatatau tonu i aafiaga o taaloga faitupe i totonu o aiga, ma aafiaga e mafai ona aafia ai le fanau, ona o le taalo faitupe o le tamā poo le tina.
O le faaaogāina o le fanau ma faasoa mai o latou manatu faaalia, e pei ona saunoa Pupualii, o se feau e oogofie i loto o mātua ma soo se tagata e faalogologo i ai.
Na faamae‘a le tolaulauga a le Mapu Maia, i pese ma aitema faapitoa a tamaiti sa lautogia i le latou tauvaga pese sa faia i le tausaga na te‘a nei, e taualuga ai le latou faamoemoe.