Ua toe manumalo le alo o Samoa o Ami Pepe, i tauvaga lauga a Aukilani

O le aso 20 o Aperila 2013, na faatumulia ai le Fickling Centre i Three Kings i Aukilani. O le paia ma le mamalu o le atunuu na lolofi atu, e fia maimoa ma molimauina poo ai o le a fai ma sui o Aukilani i le tauvaga faaiu a Niu Sila i le masina o Me i le tausaga nei, i le faalapotopotoga lenei o le New Zealand Toastmaster.
Na molimauina le faigata o lenei tauvaga ona o le matautia o failauga na latou laugaina ni mataupu e faaosofia ai le fiafia ma le fia alualu i luma o lagona o tagata mo le ola fia taumafai.
E toalima i latou mai totonu o le aai o Aukilani na tauva ai i lenei tauvaga matautia. E toafā papalagi, ae toatasi lava le Samoa.
Ae ina ua tulai le alo o le tatou atunuu, le susuga ia Ami Pepe ma faia lana lauga, na matuai pati ma po le toatele o le auvalaaulia, i le pa‘i mai o lagona faagaeetia ma lagona fiafia, ona o le matautia o le faasoa a lenei alo o le tatou atunuu ua ta‘uta‘ua tele i totonu i Niu Sila, i mea tau fai lauga.
Ina ua uma le lauga a Ami Pepe, na toe mate uma foi le auvalaaulia, e toe alu foi ma le tama Samoa lenei tauvaga. Ioe, na tulai uma i luga le toatele o le aumaimoa e faaalia le agaga faaaloalo, ina ua lau mai le iuga o le tauvaga, e toe manumalo foi Ami Pepe ia Aukilani.
E lua ni faailoga na maua e Amituanai i le aso lea. O le faailoga o le tulaga muamua i le tauvaga lauga ma le faailoga lona lua, o le avea ai o ia ma se failauga e maua ai le agaga mālie, fiafia ma le ata o le auvalaaulia.
O lea la ua sauni atu nei le susuga ia Ami Pepe mo le tauvaga faaiu a Niu Sila atoa, e faia i Ueligitone ia Me i le aso 10 – 12 i le tausaga nei lava. O sē e manumalo mai i Ueligitone, e fai ma sui o Niu Sila atoa e tauva i le tauvaga faavaomalo, e faia i Sinisenati i Amerika ia Aukuso i le tausaga nei 2013.
O se faamatalaga a Ami e faapea, o ia o loo iai lona naunautaiga mo le tauvaga tele i Amerika. Ae faamoemoe pea i le Atua nei taumafaiga uma, ma le faatonutonuina o lona mafaufau ina ia faataunuuina ma le manuia lenei faamoemoe.
Ua iai foi nisi o matagaluega, faalapotopotoga ma ekalesia, ua latou faaaogāina i le taimi nei le taleni a Amituanai Timo Pepe, e tautalagia ai le tele o mataupu mo le fia alualu i luma o le olaga fia taumafai o le tagata soifua.