O tu, aganuu ma agaifanua a le tamaititi, o le a lē mafai ona ulufale atu i le potu aoga, sei vagana ua faatāuaina ma faaulufaleina muamua i le loto o le faiaoga.
O le manulauti lea sa fai ma mea taumafa o le mafaufau a o alofaiva atu le komiti faafoe o le SAASIA i le latou fonotaga mulimuli o le tausaga e pei ona usuia i le aso 18 -19 Novema i Kalaiesetete.
O le Aso Faraile 18 Novema na tatala aloaia ai le fonotaga i le Iunivesite Lincoln ma amatalia i se tatalo puupuu saunia e le faatina o le SAASIA, faletua malolo Iolesina Tagoilelagi ma faagasolo loa polokalame taitaia e le taitaifono, afioga Sala F. Tagoilelagi – Leota, o le failautusi Tulimalefasi Isabella Dick ma le teutupe Sofaea Penn.
O le faletua Elisapeta Tumama Vili & Ruta McKenzie o sui mai Kalaiesetete faatasi ma le mamalu o sui auai i alii ma tamaitai faiaoga o Aoga Amata Samoa.
I le aso muamua, sa faamamafa le polokalame mo le komiti faafoe auā le faaleleia ma le autalaina o latou galuega faia e ala i le faalauteleina o le tomai tau tekonolosi, talu ai o le senituri 21 ua iai tele o suiga, e ao la ina faafouina ma tului pea galuega a faiaoga atoa ai ma le fofogaina o le tala o le tupe.
Mataupu talanoaina e toe sasaa i ai le fafao
O le Aso Toonai na toe masii atu le fonotaga i le pitonuu toafilemu ma le lanulauava o Lincoln, ma faaauauina le polokalame i mataupu nei sa soalaupule i ai le komiti:
• Toe iloilo le faavae, aemaise o se Auivi ma se alafua (Strategy Plan) e taialaina ai le SAASIA mo le isi 5 tausaga.
• Faafouina o le SAASIA: silasila toto’a i le toe faatautaia o polokalame aemaise nisi auala poo ni sitepu toe laaina. Gagana faaaogāina e le faiaoga ia faigofie ona malamalama le tamaitiiti.
• Fausiaina o alaga’oa mo le fesoasoani i faiaoga. eg: tala pupuu mo tamaiti, fagogo, pese ma taaloga. Faatāuaina metotia faaaogāina i Samoa auā e eseese concepts a Aoga Amata gagana Peretania ma le Aoga Samoa. A maua e le faiaoga le sosia i le aganuu, o lana ‘oa lea e tufa atu i le tamaititi ma faigofie ai ona fesootai ane.
• Faatumauina le faaalualu pea o polokalame i Aukilani, Ueligitone & Kalaiesetete.
• Toe tepa i tua ma toe tagai i galuega SAASIA na faia i le koneferenisi Iulai 2011.
• Faaleleia o le nusipepa Taulogologo atoa ma le upega tafailagi (SAASIA website)
O le toe fonotaga lenei e pei ona amata mai Aukilani, e tapu’e ma ta aofai ai nisi o metotia auā le faa’oaina o le galuega i le mafaufau mo le mamanuina o fanau a le atunuu a o totogo ane le moemoe o le ola a’oa’oina.
Na taape le mafutaga ma faalumaga faalemafaufau e ala i fetufaiga i mataupu anoa na soalaupuleina, o le faatofala’iga e lē moenoa ae moe manatunatu ina ia tupu le fatu totoina, totogo a’e le moemoe avea ma laau tupu talaulau ma ia fua.
Matagofie mea taumafa paleni lelei toe felanulanuai mo le tino malosi auā le tausiga o le mafutaga i aso e lua.
