Popole Lealailepule faaitiitia faitau aofai o Samoa

O le toatele o tagata Samoa ua malaga i atunuu mamao ma faamautu ai, ua faaalia ai e le Vaega o loo faatautaia le tusigaigoa a le atunuu i lenei tausaga, e ono faaitiitia le faitau aofai atoa o tagata o loo nonofo pea i Samoa.

O le toatele lava ua o ese ma le atunuu ua agai atu i Niu Sila ma Ausetalia. O le feagaiga i le va o Samoa ma Niu Sila, le Quota ua maua ai le avanoa e 1,100 i tausaga taitasi e agai atu ai tagata mai i Samoa nei, e nonofo ma faamautu ai i Niu Sila. O le isi toatele o loo agai ese ona o aoaoga ma galuega faavaitaimi, ma na ta’ua e Sefuiva Muagututi’a o le mafuaaga tele lava lea o le faaitiitia o le numera o le faitau aofai o le atunuu pe a fuafua i le maualuga ua tatau ona oo i ai.

O le faitau aofai sa iai i le tusigaigoa mulimuli sa faatautaia i le silia i le sefulu tausaga talu ai, na tulai mai ai le aofai e sili laititi atu i le 180,000 le aofai na faamauina. O le faaitiitia o se faitau aofai o se atunuu atonu o se tulaga lelei i le vaai, ae mo le atina’e o le tamaoaiga o se atunuu e lē o se tulaga lelei lea.

Faaalia e le Peresitene o le Faalapotopotoga o Pisinisi i Samoa o Namulauulu Sami Leota, e moomia le toe iloilo lelei o ana suesuega ona faato’ā mafai lea ona fai se faamatalaga i lea mataupu ae na ia ta’ua e manino lava o le toatele o tagata o le tele foi lea o le pisinisi auā e toatele tagata e faaaogā tautua ma auaunaga.

Faaalia foi e le Afioga i le faipule mo Faleata i Sisifo lea e iai Vaitele, o se tasi o nofoaga aupito vave le faaopoopoga o tagata ua nonofo ai, o le leai lava o ni galuega i Samoa ua mafua ai le agai o tagata i fafo ma saili manuia ai. “Ae moomia tagata i soo se atunuu ae e le o lava tagata i totonu o le atunuu.

“Manatua foi o le toatele o tagata o le tele foi lea o galuega, tele gaioiga e vaaia i totonu o le atunuu,” o se saunoaga lea a Lealailepule.

O le popolega na ta’ua e le alii faipule, e faigata tele le taumafai o pisinisi e atia’e ae o loo tumau le laitiiti o le maketi i totonu lava o le atunuu.

Faaalia foi e se tasi o faifaatoaga lauiloa i le atunuu o Ricky Westerlund, o le laitiiti o le faitau aofai o le atunuu o se faafitauli ia i latou e totoina le eleele ma o loo faamoemoe i fua o a latou faatoaga e saili ai se tupe. O se mataupu foi na laga e le alii Palemia i se fonotaga ma le Faletupe o Atina’e a Asia, o le laitiiti o le numera o tagata faigaluega i Samoa.

Na talanoaina lea tulaga ona o le fesoasoani na fuafua le faatino e le Faletupe lea mo le galueaina o fanua faaleaganuu auā atina’e tau pisinisi.

Na faaalia ai e le alii Palemia o kuata eka e aogā e fai ai nei atina’e. Le ituaiga tele lea e mafai lava e le tamā ma lona atalii ona faamamā ona ua agai uma fanau i fafo.

E oo atu i le to’a 5,000 i latou ua agai i Niu Sila ona o le Quota. Na laga foi i le Palemene e le Palemia lea lava faafitauli i le tau leai o ni taulelea i nuu e toe galueaina le eleele, ma na ia ta’ua ua mafua lea ona o le toatele o taulelea ua agai i fafo i galuega faavaitaimi.

O le itu lelei o le agai i fafo o le toatele ona o le tupe o loo faamomoli mai i aiga, o se tasi o tupe tele ua maua e Samoa i tausaga taitasi.

O se tasi la lea o fesoasoani i le tamaoaiga o le atunuu.