Ua mae‘a le fono tele lona fā a tamaitai faipule o le Pasefika na usuia i Samoa nei ma le faamoemoe ia saga unaia ai le tulaga taitai o tamaitai i totonu o atunuu o le itulagi. O lea fonotaga na aofia ai ma se isi fono a le Komiti Faufautua a tamaitai mo le fausia o atinae o tamaitai i le itulagi. O le fono faufautua lenei e aofia ai alii ma tamaitai e to‘a 12 mai i atumotu o le Pasefika e aofia ai Fiti, Kiripati, Vanuatu, Papua Niu Kini, le Atu Malesala, le Atu Solomona, Tonga, Vanuatu ma Samoa.
O tagata nei e galulue i ofisa o le malo, o Faalapotopotoga tumaoti ma pisinisi ma o tagata foi ua tofia i lenei fono faufautua ua iloga lo latou leo i le unaiga o avanoa tutusa i taitai o atunuu o le Pasefika. E aofia ai foi ma le ofisa o le Fono a Malo o le Pasefika le Pacific Island Forum ma le Fono a Atumotu o le Pasefika le SPC. O polokalame ua faatuina ai lenei fono faufautua e faatupe uma e le Malo o Ausetalia, o se vaega o lana foi taumafaiga e saga unaia le sao o tamaitai e avea ai ma taitai o o latou malo ma na ta‘ua e le taitaifono o le Komiti faufautua, le afioga i le Sui Palemia o Samoa, Fiame Naomi Mataafa, o se taumafaiga lenei ina ia saga faaleleia le tulaga o tamaitai i galuega faapea ai le siosiomaga lautele o o latou aiga ma fanau. Ua unai ai foi tu ma aganuu a atumotu eseese o le Pasefika.
Na faafetaia e Fiame le sao o sui nei o le Pasefika i totonu o le Fono Faufautua ma lana saunoaga e faaauau le unaiga o tulaga o tamaitai i atumotu taitasi. Na maua se avanoa e auai atu ai sui o lenei fono faapitoa i le fono tele a tamaitai faipule o Ausetalia, Niu Sila ma le Pasefika sa i Samoa mo le latou fono tele, ma na asia e ia sui le Faalapotopotoga o fesoasoani mo Faalapotopotoga tumaoti le CSSP ma le polokalame o loo fesoasoani ia i latou ua foi mai i fafo ua mae‘a ona tuli faasalaga faafalepuipui i solitulafono na faia i fafo.
Na feiloai atu foi i tamaitai faamasino e toalua, le faamasino o le faamasinoga maualuga ia Mata Tuatagaloa ma le tamaitai faamasino o le faamasinoga o soligatulafono o le ava malosi ma fualaau faasāina ma maua ai se avanoa e faatalatalanoa ai le taumafaiga i tua atu o nei faamasinoga, e taofia ai nei solitulafono ua fesootai i sauaga i totonu o aiga.
