O Tesema o le tausaga e 2012 e pei ona faaalia e se tasi o alo e faasino i le afioga Leota Leuluaialii Ituau Ale, na faaumatia ai lo latou maota i le malaia poo le afi ina ua faatino e nisi o taulelea o le nuu se gaioiga solitulafono.
Na mu atoa le maota, alu ai ma nisi fale faapea foi ona faaleagaina ai ma se taavale.
E lē faitaulia ai meatotino sa i le fale na liu efuefu ai. O le tausaga foi lea na faia ai se iuga a Alii ma Faipule o Solosolo e soloa i le aufuefue le afioga Leota Leuluaialii Ituau Ale ma lona aiga.
E lē toe tau faamatalaina vala sa fetineia‘i ai le lotoifale o lea tamalii o lona aiga ma le nuu i nisi o mataupu e lē gata o faamasinoga i Mulinuu ae faapea foi i le va nonofo ai. O futia na tutupu na liliu ai le afioga i le Faasisina ma fai lana lava faiganuu lea na ave e Alii ma Faipule i le Faamasinoga o Fanua ma Suafa ma aumai ai le faaiuga e tasi lava le faiganuu a Solosolo.
Na alu a‘i alu a‘i ia feteenaiga ae toe faamasino itu e lua ina ua ave e le afioga i le Faasisina se talosaga i le faamasinoga e tatau ona toe foi i le faiganuu ona ua leai se mafuaaga tuga ua taofia ai lona toe oo i le faiganuu a Solosolo.
Na faia le faamasinoga ma aumai ai le faaiuga e tatau i Alii ma Faipule ona toe foi atu Leota Leuluaialii Ituau Ale i le faiganuu.
Peitai o se faaiuga na aumai i le taimi ua sauni itumalo o le atunuu i le faigapalota tele ua mavae atu nei.
Sa lē talia e Alii ma Faipule le vaega lea o le faaiuga ma lē taunuu ai le manao o le afioga Leota ua toe fia foi. Na manino foi le iuga lea e leai se sootaga o le palota ma le faaiuga i le toe foi o Leota i le faiganuu. Peitai sa faauliulito le finagalo o le nuu.
Na tauva Leota i le palota ma o ia le isi sui tauva o Solosolo faatasi ai ma se tasi o matai. Ina ua faatino le palota ma aumai le faaiuga na tulaga muamua le Faasisina i palota na ia maua i lona nuu o Solosolo, ma o se isi lea o tulaga na matuā faafiafiaina ai o ia, ona o se tali faaaliali lea o le fulisia o le lagolagoina o ia e lona nuu.
O le fono a Solosolo i le Aso Gafua o le Eseta na tafa ai le finagalo o le Taofia, ma le mamalu ia Saleutogipo‘e e ulumatua i tofiga ia avea le agaga o le Eseta e lagona ai e le nuu le loto faamagalo ma faagalo mea na tutupu ae ia toe faaulufale le afioga Leota ma lona aiga i le faiganuu.
“O se tala fiafia mo a‘u nei ma le aiga ina ua tu mai le tootoo”. O le finagalo lea o le Faasisina ina ua faatalanoa e le tusitala. “Ua tigaina lava a‘u nei i le finagalo o le nuu ae pagā lea o le loto lava ia e fia foi pea e fai le nuu sa ou ola mai ai. O upu masani foi a Samoa e lē po pea se nuu”.
O le toe foi o Leota i le faiganuu na ia faaalia sa talosaga i le afioaga e tuu atu se avanoa ona e lē fia alu atu ma lona fatafatafa ile nuu.
E ono povi poo manu papalagi, o pusaapa ma pusamoa, o pusa falaoa vela, tupe na faaalu i lafo aemaise o Ie tetele na tatala au‘afa ma moegalafo ae teu a‘i le afioaga aemaise o Malo sa auai.
“Faafetai i le Atua ua ou toe foi filemu i si o‘u nuu e pele i lo‘u loto ma lo‘u agaga, faafetai foi Samoa i lau tapuaiga”, o toe upu ia a le afioga i le Faasisina a o lei faamuta le ma talanoaga i lona maota i le taeao o le Aso Faraile 8 o Aperila 2016 na faatino ai ana faaaloaloga ma toe foi i le faiganuu a Solosolo.
