Folafola le solotetee a tausi soifua

“O le mea lena o le a oo i ai se faatatau pe a talo se matou fono faapitoa, pe afai e oo atu i le amataga o Oketopa e lē maua le siitaga o totogi”.
O le saunoaga manino mai lea a le Pelesitene o le Faalapotopotoga a alii ma tamaitai tausi soifua le Samoa Nurses Association, le faletua o Faamanatu Nielsen ina ua toe tapa mo sona finagalo e tusa ai o se tulaga ua oo i ai feutanaiga mo le faatinoina o le siitaga o totogi o tausi soifua.
“O lea ua momono mai e fai faatasi ma totogi o isi o le matagaluega ae e ese lava le siitaga a tausi soifua”.
E $1.9 miliona le vaegatupe ua mae’a ona pasia e le Kapeneta i le tausaga e 2006 e faatino ai le siitaga, peitai ua savalia nei le 4 tausaga e lei faatinoina.
O le aso muamua o le masina fou o loo finauina e le Peresitene o le sosaiete a tausi soifua e tatau ona maua ai le siitaga, ma a leai o le a talo loa se fono a talanoaina ai le mataupu ma o le taunuuga o lea fono faapitoa o le faia o se teva poo se strike.
O le popolega lea o le Tautua Samoa e pei ona saunoa le sui taitai o lea vaega faaupufai, le afioga A’eau Peniamina.
“O itu la na e popoe i ai se taofi pe afai e tulai mai ona e vaai alofa i le mamalu o le atunuu”.
O loo lagolagoina e le taitai ma le sui taitai o le Itu agai le fanoga o le sosaiete a tausi soifua i le tatau loa ona faatino le siitaga.
“O le matou tatalo lea i le Malo e alofa e silasila ane i le mafatiaga o feagai ma nai tausimai pasi”, na saunoa ai A’eau Peniamina i se feiloaiga ma tusitala.
Faamaonia e le Komiti faafoe tupe ua pasia o le siitaga
Ua faailoa faalauaitele e le Komiti Faafoe o le pulega o le matagaluega o le soifua maloloina le mae’a pasia o le siitaga atoa ai ma le vaegatupe e tasi le miliona ivaselau afe mo le faatinoina o le siitaga o totogi o tausi soifua.
Peitai ua mafua ona faatuai gaioiga mo le totogiina o le siitaga ona o loo faatali i le faatulagaga atoa poo le structure a le matagaluega e maua ai ma le faaopoopoga o faamanuiaga tau totogi mo isi tagata faigaluega a le soifua maloloina.
O le itu lea o loo tee i ai le lagona o le sosaiete a tausi soifua ona ua mae’a ona iai lana faatulagaga poo le structure ae lē iloa pe aisea o le a faatali ai fua i le faatulagaga atoa o le matagaluega e faaofi i ai ma latou ona faato’ā maua ai lea o le siitaga.
“E lē fetaui tele lea fuafuaga ma ua uma ona matou tali i ai e faaalu le siitaga latou mo tausi soifua ma e lē ninia faatasi vaega ia e lua”.
O le finagalo lea o le afioga A’eau Peniamina o se sui o le sosaiete a fomai a Samoa lea foi na ave i ai le fuafuaga e le komiti faafoe a le soifua maloloina mo se latou manatu. Faaalia e A’eau na avatu le fuafuaga ae sa teena e le latou asosi e faapea foi i le sosaiete a fomai le Samoa Medical Association.
O le finagalo o A’eau o le faatulagaga lava ia o le auaunaga faalesoifua maloloina e tu ese lava tausi soifua.
O loo faatalitali nei tausi soifua pe o afea e maua ai le siitaga ae pe faamata o le a logosaia e le pulega ma le Komiti Faafoe le manao o le peresitene e tatau ona maua le siitaga i le amataga o Oketopa 2011.