E telē se aogā ma se tāua o ni faamoemoe faapea auā e toe tata’i maia ma faatasia ai aiga ma uo mai soo se atunuu o le lalolagi.
O le taeao segisegi ma le toto’a o le Aso Toonai 24 o Setema, na sainia ai se feagaiga ina ua tasi le finagalo o le alii mai Sikotilani i le tamaitai o Elevalesetagata e avea ma ana manamea ma filifilia loa e uia ala o le Atua.
O le tamaitai o Elevalesetagata o si ona tina o Faimafili Fesola’i Ho-Ching mai Faleasiu ma si ona tamā o Talapō Saleaula Uivaa mai Fogatuli & Falealupo. Sa taitaia le sauniga i le Ekalesia a Iesu Keriso o le Au Paia o Aso e Gata Ai e le susuga ia Bishop Tupu Noa Aiono faatasi ai ma le lagolagosua a le Fesoasoani muamua ia Brother Foua, ma le Fesoasoani lua o Brother Pepe Patu.
O le tofa ia Poto To’afa Iuli mai Faasaleleaga sa fai ma fofoga o le aso.
E lē mafaitaulia le tele o malo faaaloalogia sa faatasi mai e pei o le Uncle o le tamaitai ia Uivaa Eti ma le faletua ia Francis Kay Uivaa mai Utah i le laumua o le ekalesia i Amerika, le tama ia Ino Lealiiee malaga mai Sini ma nisi o aiga malaga mai Shanghai i le malo tele o Saina, o ona tuagane ia Finauga ma Faaoloviti Uivaa ma aiga Niu Sila faapea uso ma nisi aiga malaga mai Melepone.
O le faaili mālie a le Ululama Band sa vaavaalua ma le faaili mai Niu Sila ua igoa o le Fofoga o le Usoalii sa faafiafiaina le auvalaaulia ma le aiga fou.
Na faamalieina le aumaimoa i le ausiva matagofie a Luse Uivaa Iuli ma le vaega o le uso o le tamaitai faaipoipo o ia foi sa saunia le keke ma le ofu faaipoipo.
Sa auai foi le faatamā o le faaili a le Ululama le tofa ia Gaga Epa ma le aufaaili. Sa auai foi le susuga i le Faatonu o le leitio 4EB 98.1 FM i Brisbane, Savea Levale ma le faletua ia Siaa Lio ma le aufaigaluega.
O le susuga ia Tuioti Setu na fai ma sui o le auvalaaulia e faafetaia aiga na lua i le tele o palapala a malo ma le maoa ‘e ole teu faatamalii sa faafao i ai le paia i aiga. Manuia tele le aiga fou Elevalesetagata ma Desmond Arthur Carrodus!
