Fofogaina i le faamasinoga le aveese o le tapu o igoa

E toalua ni alii matutua na tulai mai i tofiga faafaipule mai i le motu tele i Salafai o le a fofogaina e le Faamasinoga Maualuga finauga mai ia la loia faapea loia a le Malo i le puipuia ai o o la suafa mai le faasalalauina ona ua tuuaia i ni soligatulafono mataga. O nei tamalii o le atunuu na tulai uma i luma o le Faamasinoga Maualuga i lenei vaiaso.
O le tasi o i laua nei, e 10 moliaga o le faia o ni uiga mataga, 10 moliaga o le taumafai e fai uiga e faamatau ai le ua tagi, tasi le moliaga o le taumafai e fai se faigaaiga faamalosi, ma le tasi o le faia o ni sauaga mataga o loo tuuaia ai. O loo ia teena ia moliaga. O le isi e lua tuuaiga o le taumafai e fai se faigaaiga faamalosi ma isi moliaga e lua o le faia o ni sauaga mataga o loo tulai ai ma o loo ia teena foi ia moliaga e fa.
O le finauga na faatu mai e Loia a le Malo o le itu lenei, o nei tamalii ua avea tofiga ma auala ua puipuia ai o la suafa ma o se faiga e manatu ia loia e le talafeagai ona o loo toatele lava isi alii ma tamaitai o loo faalauiloa o latou suafa pe a tuuaia i ia soligatulafono.
O le finauga a loia a i laua nei talu ai e lei faamaonia nei tuuaiga ae o ni tamalii e maualuga tulaga ma tofiga i totonu o le atunuu e tatau ma talafeagai ai le taofia o le faasalalau o o la suafa i nusipepa, leitio ma televise. Ua tele faamasinoga faapenei ma o le tele lava o nei mataupu e faalauiloa lava suafa o i latou e tuuaia i nei faiga sei vagana ai o loo finauina le puipuiga o le suafa o se ua aafia poo ua faia le tagi faasaga i e ua molia atu i le Faamasinoga i nei uiga mataga.
O le tulafono lava ia e le faalauiloaina le igoa o se tasi e tuuaia i sauaga mataga pe afai o le ua aafia o sona afafine poo sona tei foi. Ae o le talosaga a le Itu Tagi e tele ina tuu atu i ia mataupu ae o le tele o mataupu ua aafia ai tamaitai matutua ma o tamaitai foi e le o iai se fesootaiga faaleaiga ma i latou ua fai faasaga i ai se tagi ma e le o iai se popolega i le faasalalau o o latou igoa poo fesootaiga ma i latou ua tuuaia, e tele lava ina faalauiloa suafa o i latou nei.
O le vaiaso fou e iloilo ai e le Faamasinoga pe ua talafeagai le faalauiloa o suafa o nei tamalii pe leai foi.<