“Ia faamavae le Fofoga Fetalai,”… Palusalue Faapo II
Ua finauina e le sui taitaifono o le vaega faaupufai o le Tautua Samoa le afioga Palusalue Faapo II, poo a mafuaaga ua taofia ai i se faatonuga a le Fofoga Fetalai, Tolofuaivalelei Falemoe Leiataua, o latou totogi ma alauni. “E foliga e le o amanaia e le Fofoga o le fono le faaiuga a le faamasinoga ua toe faatumau ai o matou tofi faipule”, o le saunoaga lea a le tasi o faipule o nofoa e lua o Safata le afioga Palusalue Faapo II. O loo tumau le talitonuga o le Tautua Samoa, e lei aveesea o latou tofi faipule talu mai le aso 29 o Me na faia ai le faaiuga e soloia o latou tofi. O lona uiga i se manatu maumaututu o lea pati, e lei aveesea o latou tulaga mamalu o sui o itumalo i le Palemene aua ua faaleaoga le faaiuga na faia.
Ua faanoanoa ai sui e toaiva o le Tautua Samoa party ona e le gata ua taofia pea o latou totogi ma alauni, ae ua faia foi se faatonuga a le Fofoga Fetalai i le failautusi o le Fono Aoao Faitulafono, ina ia taofi le toe valaauina o sui faipule e toaiva o le pati mai le toe auai i ni fonotaga a Komiti eseese o le palemene o loo filifilia i ai. “Ia manatua o nisi o faipule o lenei vaega o loo avea ma taitaifono ma sui taitaifono o ia komiti, ae taua le iai o matou ona lauliliuina tulafono taufaaofi ma lipoti a matagaluega ma faalapotopotoga a le Malo. E foliga mai e le o amanaia e le Fofoga Fetalai le faaiuga mamalu a le Faamasinoga, aemaise ai ua tele tupe alu vale ma faamaumau a le atunuu ma le Malo o le a alu i le totogi o le faamasinoga ma loia, ona o le faaiuga a le Fofoga Fetalai lenei, le tofa Tolofua”, na toe saunoa mai ai Palusalue.
“Ia faamavae le Fofoga Fetalai”
Ua autasi finagalo o le Tautua Samoa i se latou fonotaga, ua tatau i le alii Palemia ma le vaega faaupufai o le HRPP ona fautuaina le Fofoga o le fono e faamavae, ona e le gata ua faaleaogaina lana faaiuga ae o se isi lava faaiuga na te faia i le lumanai o le a fesiligia lona sao atoatoa. “O le mea la lea o le matou talitonuga e tusa o le tausia o le mamalu ma le faaaloalogia o le tausiga o le maota o Samoa, ia saili se isi e avea ma Fofoga Fetalai i tausaga o loo totoe o le paeaiga. E le o se matou taui ma sui o le lagona foi matou te alolofa i le Fofoga Fetalai, o se uso a faipule ua leva ona matou galulue. O lea matou te faapea atu ai i tulaga aloaia, ua tatau ona faamavae le Fofoga Fetalai”, o le isi lea finagalo o le sui taitaifono o le Tautua Samoa party.
O loo faatali nei se finagalo o le taitai o le Malo i le alii Palemia o loo faatali i le faaiuga tusitusia a le faamasinoga. Ae ua ioe Tuilaepa sa taloina le latou fono a le faafaletui a le HRPP i le Aso Faraile, 3 o Iulai 2009 ina ua maea ona aumai le faaiuga a le faamasinoga ile Aso Lulu, 1 Iulai 2009. O le fono lea na saga faaalia ai le lagolago a le faafaletui i le faaiuga a le Fofoga Fetalai, peitai o loo fesiligia le moni o lea manatu o le taitai o le vaega faaupufai ona o loo iai finagalo o nisi faipule o le HRPP e faapea, o le tolu kuata o faipule o le faafaletui o loo le fiafia i le faaiuga. Pe ana fai e faia loa se palota a le faafaletui i le mataupu, e fulisia faipule i le aveesea o le Fofoga Fetalai ae saili se isi sui na te tauaveina le tofiga. O tuuaiga a nisi faipule o le itu a le Malo e faapea ua tele nisi lafoga a le Fofoga Fetalai i le palemene ua ia tuumamaina ai le tulaga mamalu o nisi faipule, aemaise o le tele o ona finagalo e atagia ai lona tau faatauvaaina o sui mamalu o itumalo. E lei maua se finagalo o le Fofoga Fetalai ona o loo toesea mo fonotaga i atunuu i fafo.
