O upu masani o le atunuu e fai i le gataifale, “A lutaluta ma siisii le tai, e na o le Tautai mata palapala e tapa i ai le auvaa.
A lutia foi le folauga i le vasa, e manaomia le Tautai moni e masani i aga a le tau e tu i matagiolo”.
E faapena tonu lava se vaaiga i le taimi na finau ai le taaloga faaiu o le sueina o le Pine Auro i le taaloga Netipolo, i le va o le Silver Fern a Niu Sila ma le Taimane a Ausetalia, aemaise ina ua tutusa le taaloga, ae uma ma le taimi.
Peitai o le alo o Samoa le tamaitai o Maria Tutaia lea na fofoina le faafitauli i le minute mulimuli o le taimi faaopoopo, ma manumalo ai Niu Sila i le Pine Auro i ‘ai e 66 – 64.
O se taaloga lava ina a mataina talu ona feagai nei au malolosi e lua i le taaloga Netipolo, auā e faatolu lava ona taaalo i le la taamilosaga masani a o lei faia taaloga nei ma manumalo faalua ai Ausetalia ae tasi Niu Sila, lea foi la ua iu lava foi ina toe feiloai i le sueina o le Pine Auro o le Commonwealth.
Ina ua tutusa le taaloga i le tai 47 ae uma le taimi, sa fetogiai solo lava le polo ma finau ‘au uma e lua i ni ‘ai i le taimi faaopoopo.
Ae o le penefiti lava lea a Niu Sila e pei ona saunoa le Tamaitai Faiaoga, ona o le tamaitai o Maria e mafai ona ia togiina le polo i le mama mai soo se mamao, lea lava na ia toe faatepa le maimoaga a le lalolagi i lana togi mulimuli ae uma loa le taimi.
O Maria Solinaima Tutaia ua 23 ona tausaga, sa soifua mai i le pitonuu o Tokoroa, ae lei agai mai i Aukilani ma nai ona tuaa e mai i afioaga o Nofoalii ma Saanapu i Samoa.
I se faatalanoaga a le ‘autusitala ma le tamaitai taalo ina ua mae‘a le taaloga na ia saunoa ai, e leai se isi mea ina ua ia mauaina le polo, na o le tuu atoa loa o le malosi ma faato‘ato‘a loa i le mama.
Fai mai Maria o lona tulaga o le GS (Goal Shooter), o lana galuega la o le togi loa o le polo, ma o le avanoa mulimuli foi lea na te lē toe maua, e lē tatau foi ona misi, auā a o ia uuina le polo i ona lima, a o le Pine Auro o loo faatalitali mai.
O le taimi lava na sao ai le togi a le tamaitai ae uma ma le taimi, na lē toe faatali ai loa ae faasaga ane loa fusi ma le isi tamaitai o lana ‘au na latalata ane, o le faailoga o le agaga mitamita ma le loto olioli.
