E fai o le atumutumu o totonu o le Maota o le HRPP i Mulinuu ae o fafo i fale‘ie na faatutu ai i itu e lua o le maota lenei na matuā faatumulia i le mamalu o sui o le Vaega faaupufai e Puipuia Aia Tatau a Tagata ina ua faamanatu le atoaga o le 31 o tausaga talu ona faavae lenei Pati.
O se vaega faaupufai ua matuā umi paeaiga o le Palemene o latou umia ai le foe o le atunuu e pei foi ona iai lenei paeaiga ua lamalama faaiu.
O le Aso Fanau o le HRPP ua faamanatu faatasi ma le faamoemoe e faalauiloa ai sui tauva o le Vaega Faaupufai a o alo atu ai Samoa i lana faiga filifiliga tele mo sui faipule o le Palemene i le tausaga fou i le masina o Mati.
E pei lava ona amata faalauiloa mai i le atoa ai lenei o le masina, e silia i le to‘a 50 sui tauva ua faatutu mai a le HRPP mo le faigapalota tele i le tausaga fou.
Ua lē gata la o loo tumau nisi o sui ua atoa i ai le to‘a 36 o faipule o lenei vaega faaupufai i totonu o le Palemene i le taimi nei ae o sui tutoatasi e toafā ua manino foi lo latou manaoga e tauva mo le HRPP i le tausaga fou ua ta‘ua e le Taitai o le Vaega Faaupufai, le Alii Palemia Tuilaepa Lupesoliai Sailele Malielegaoi, ua mautinoa ai i le taimi nei e to‘a 40 lava sui o le HRPP o loo i le Palemene.
O i latou foi ia na ta‘ua e le alii Palemia ua ave i ai le faamuamua i le tausinioga o sui fou mo le Palemene i le Palota tele a le atunuu, ae ua iai lava se isi vaega ua faaigoaina o sui tutoatasi o le Palemene o le a tausinio ae o le a tausinio o sui tutoatasi a le HRPP.
O le saunoaga autū a le Palemia auā le faamanatuina o le 31 o tausaga o lenei Pati, na ia faamamafa ai le tāua o galuega faatino nai i lo na o le faalele o faamatalaga.
Faaalia e le Taitai o le vaega faaupufai a le HRPP, ua tele foi faamatalaga ua faalauiloa i lenei vaitaimi i le sauni ai i le palota tele, ua faapea mai ai nisi o sui o loo toatele i latou ua omai i le HRPP ma ua fia tamomoe mo le palota i lalo o le fu‘a a le HRPP, ae ua iai le manaoga e ofi loa i totonu, talepe mai iina le vaega faaupufai.
Ta‘ua e le Alii Palemia o nei lafoga o ni tala tau faasese ma le lē moni. Ua ia laga foi le finagalo lē malie o le Tautua Samoa faapea o le taumafaiga a le HRPP o loo iai nei ua matuā malosi ai lava lana uu i pulega faamatai i afioaga o le atunuu, e ala lea i komiti ua tofia ai sui o afioaga taitasi i totonu o matagaluega eseese a le Malo ma ua faigata ai e sui o loo fia tauva i isi vaega faaupufai ona finau atu i le manaoga o itumalo ma alii ma faipule o nuu, ina ia tauva i le fu‘a a le HRPP, tusa pe ese le pati e fia tamoe mai ai se sui tauva.
O le faamatalaga a le alii Palemia i lana saunoaga i le Aso Fanau, e oo loa le tagata i faiga faapolokiki ma ua manao e avea ma sui faipule e tulai mai mo itumalo, e manino lava e lē mafai ona faia lona finagalo ae e mafuli lava ina faia le finagalo autasi o itumalo ma e papuipui lava soo se faipule pe a tulai mai e avea ma sui o itumalo o le atunuu.
O le faamalosiau a le Taitai o le HRPP i lana vaega faaupufai, ina ia manatua le faatino o galuega mo le atina‘e lautele o le atunuu, o le mafuaaga lea o le faavae mai o le HRPP ma o le mafuaaga foi lea i lona taofi o le a tumau ai le malosi o lenei vaega faaupufai i le taimi nei.
O nisi o malo faaaloalogia i lenei sauniga i le faaiuga o le vaiaso na tea nei na aofia ai Le Mamea Ropati lē sa taitaia mai le vaega faaupufai o le SDUP, lea na faataape ina ua lē ausia le numera faatulagaina e faatu ai se vaega faaupufai ma o le sui faipule lea o Lefaga ma Faleaseela, o loo tulai mai i le taimi nei o se sui faipule tutoatasi.
O le tamā ia Le Mamea o se tasi o sui tuai o le Palemene ma o se tasi foi sa avea ma sui faavae o le HRPP ae ua tele tausaga talu ona suia vaega faaupufai e tulai mai ai.
O le isi sui faipule sa i le SDUP foi ma le SNDP, o le afioga Tuia Paepae Letoa lea ua tulai mai i le isi nofoa o le Palemene mo le Itumalo o Safata. O lea foi ua tutoatasi i le taimi nei ae o loo iai le manaoga e tauva mai i le tausaga fou i lalo o le fu‘a a le HRPP.
O loo toalua mai ma le Afioga Palusalue Faapo II, lea ua tulai mai o se sui a faipule o le Tautua Samoa ma ua iai le manaoga ina ia faatuina lea Vaega faaupufai ina ia mafai ona suia le Malo, pe tulai mai o se tasi o Vaega faaupufai e mafai ona malosi le agaia o le Malo i le lumanai.
