Ua tau i le lagi le fiafia o pisinisi laiti na aafia meatotino e pei o oloa i le mu o le maketi i Savalalo, ona o le toe faaauau o a latou pisinisi i lalo o faleie lē tumau ma nisi o nofoaga ua fausia i luga o le eleele sa tu ai le maketi, ua saga palasi atu i ai ma fesoasoani tupe.
O le Samoa Offering Hope Trust o se komiti tau mavaega na faatuina e saili fesoasoani mo nei pisinisi, ua latou ausia nei se vaegatupe e silia i le $20,000 ma o se taimi ona tufatufa lea i pisinisi na aafia i le mu ona o loo faatali nisi foai o le a tuuina atu i faletupe e fā i le atunuu ae o lea ua taulimaina nisi foai.
O le lima afe a le Samoa Commercial Bank, lua afe mai le ANZ Bank ma le tasi le afe a le National Bank of Samoa o foai muamua ia, ae o le faletupe o le Bank South Pacific o loo faatali nei i ai.
O le pisinisi inisiua o le Federal Pacific na latou tauaao le $20,000 i le vaiaso ua mavae o se seleni ua tufatufa ae e lē o aofia uma ai pisinisi. Ua na o pisinisi na sili ona mafatia e pei o le au fai faleoloa ma nisi o poloka faatau lavalava e fai si tele o a latou meatotino na faaleagaina ua lavea i le tufatufaga e ta‘i $400 tala.
O loo iai le faamoemoe o le taimi e mae‘a ai le fesoasoani a le Samoa Offering Hope Trust o le a feololo se tupe e maua mai ai ona vaevae lea ia tofusia uma pisinisi na aafia. O le agaga fiafia lea o nei pisinisi ona sa iai le manatu o le a leai se fesoasoani faapea e oo atu, ae ua maeu le agalelei o le atunuu e ala ia latou seleni sa tuuina atu i teugatupe faapitoa i faletupe faapisinisi e fā i le atunuu o loo faamaopoopoina le fesoasoani.
Ua faaalia e se tasi o faipisinisi i le nofoaga sa iai le maketi i Savalalo o lea ua amata ona latou selesele i le alofa tulai o le atunuu e ala i seleni, ae o le amataga ina ua mae‘a le faalavelave na muamua lava taulimaina le ta‘i tasi le afe tala mai le Malo e ala mai le faalapotopotoga o eleele a le Malo o Samoa le Samoa Land Corporation.
“O le agaga fiafia tele lea ona sa iai lava le manatu ailoga o afea e toe maua ai se pisinisi mo aoga a le fanau ma isi fuafuaga a le aiga, ae o lea ua toe vave maua le fesoasoani ma ua toe faaauau le pisinisi”.
O le lagona lea o se tasi o tina sa mafatia tele ina ua faaumatia ana poloka e lua i le malaia. “Sa ou lagona lava le leai o se faamoemoe auā e moni lava o loo iai nai fanau o loo faigaluega, ae pei lava o nai pisinisi nei o loo tua lava i ai i aso uma i nai tupe maua. Ou te faafetaia ai lava ia i latou ua foai seleni ona o i matou”.
Ua faaalia e le Pelesetene o le asosi o faletalimalo o se sui o le suegatupe o le Samoa Offering Hope le faletua o Adele Kruse, o loo tatala pea le avanoa seia oo i le faaiuga o le masina lenei o Fepuari e tuuina atu foai tupe i teugatupe ua tatala i faletupe o le Samoa Commercial Bank, ANZ, National Bank of Samoa, ma le Bank South Pacific.
