E lei nofonofo le kamupani lafotupe a le Western Union, i le fia faatino foi o sona sao i le faamanatuina o le 50 tausaga o le Iupeli Auro o le Malo Tutoatasi o Samoa e pei ona sa faamanatuina i le uluai vaiaso o le masina o Iuni.
Na faatino lenei lagolago a le Western Union, e ala i lona lagolagoina i le tulaga tau seleni o nisi o faamoemoe sa faatino i Ausetalia e faamanatu ai le Iupeli Auro o Samoa.
E le gata i lea oloo faaauau pea ona fesoasoani lenei kamupani lafotupe malosi i le tulaga o le tamaoaiga o Samoa e ala i le saunia o auala maufaatuatuaina mo tagata Samoa oloo alala i soo se tafa o le lalolagi, e lafo ai seleni i nai uo ma aiga oloo faamuli mai le atunuu pele.
Talu mai lava le tausaga e 1993, o lea ua 19 tausaga o tautua pea le Western Union i le faafesootaia mai o le lalolagi atoa ia Samoa, ma ua fesootai atu ai foi i isi lala e tusa ma le 495,000 o le Western Union oloo iai i le silia ma le 200 atunuu eseese.
I totonu o Samoa lava ia, e silia ma le 20 lala o le Western Union oloo iai, e aofia ai ofisa e sui ma lafo ai tupe, o faleoloa (grocery stores) ma fale e lafo ai meli (postshop).
O le ala foi lea o le faigofie ma vave o le faatinoga o a latou auaunaga, ma faigofie ai mo aiga i Samoa ona maua tupe e lafo mai fanau i atunuu mamao, mo le faiga o faatau, totogi pili, aemaise foi mo le faatupeina o aoga a le fanau ma le vaaia o fomai.
I le tausaga e 2011, na lafo ai e le Western Union seleni i Samoa mai atunuu e 130, o se numera ua matuā faateleina pe a fua i le na o le 10 atunuu sa mafai ona faatino ai lena auaunaga i Samoa, i le uluai tausaga na amata ai a latou auaunaga i le 1993.
I se faamatalaga a le alii faatonu faaitulagi o le Western Union mo Niu Sila ma Motu o le Pasefika, susuga ia Tasko Alcevski, na ia ta‘ua ai, ‘O se mitamitaga mo le latou kamupani le iai o so latou sao oloo fai i le atinae o le tamaoaiga o Samoa, e ala i le latou auaunaga e lafo ai tupe i Samoa mai aiga i atunuu mamao.’
Na toe fesoasoani foi le Western Union i le mamalu o Samoa i Ausetalia i le faamanatuina o le latou tutoatasi, e ala i le lagolago atu i le itu tau seleni i se siva (gala) sa faia i le Maota o le Palemene a New South Wales, i le aso 1 Iuni 2012.
E silia i le 100 tagata na auai i lea fiafia, sa faatasi ai tofiga o ofisa sinia o Samoa i Ausetalia, le Hai-Komesina o Samoa i Ausetalia, le afioga ia Lemalu Samau Tate Simi.
Na momoli le faafetai a le Hai-Komesina i le kamupani a le Western Union mo lana tautua faaauau pea oloo mafai ai ona fesootai uma tagata Samoa, poo fea lava le itu o le kelope o nopiai ai.
Sa faamamafa i le lauga a le afioga Lemalu e faapea, e tāua tele i le aganuu a Samoa le mafutaga vavalalata a aiga, aemaise lava i le va o matua ma fanau.
Ma o se mea lea ua mafai ona tausisia pea i le tele o taimi ona o le auaunaga faifaipea oloo faatino e le Western Union.
