O lea ua faagasolo nei i Honiara le laumua o le Atu Solomona, le tauvaga faaletausaga mo le sailia o se tamaitai e avea Lalelei poo le Tausala o le Pasefika i Saute, le Miss South Pacific Pageant 2013-14.
E to‘a sefulu tamaitai o le a faia i ai le filifiliga faaiu i le afiafi o le Aso Toonai nei, aso 7 o Tesema 2013, ae o le vaiaso atoa lenei o loo faagasolo ai isi vaega uma o le tauvaga, e aofia ai nisi o faatalatalanoaga ma tamaitai tauva taitoatasi.
O le tamaitai o Susana Fanueli, o le Tausala o Samoa lea o loo finauina nei sona avanoa na te paleina ai lea pale tāua mo soo se tamaitai talavou o le Pasefika, e pei foi ona pale ai i le taimi nei le Tausala o Samoa mai le 2013-13, le tamaitai lalelei o Janine Tuivaiti.
O le Aso Toonai lava foi lea o le a toe silasila tasi ai le mamalu o le aofia mai itu eseese o atunuu o le Pasefika, i se sausaunoaga faamavae a le tamaitai o Janine e tusa ai o le tausaga atoa sa ia tauaveina ai le pale o le Pasefika.
Ae o loo maualuga foi le taofi o le tamaitai o Susana, e mafai lava ona ia toe faafoi maia le pale i Samoa mo le isi tausaga. Tau ina ia manuia taumafaiga a le tatou Tausala, ma ia maua le lototele e faatino ai ou tiutefai a o e alo atu i le tausinioga. O ou māmā na Susana. Alo i ou faiva, ae o le a tapuai atu lou atunuu.
Samoa ma lau tapuaiga, mātau lau tausala, o le a ia tauaveina le Numera 6 i le faagasologa o le tauvaga atoa i lenei vaiaso, aemaise i le Aso Toonai e taualuga i ai lenei tauvaga. Palota mo lau Tausala o Samoa, Miss Susana Fanueli.
O suafa nei o tamaitai tauva mo le sailiga o se Tausala o le Pasefika i Saute:
1: Miss Vanuatu, Valerie Martinez
2: Miss Fiji, Priscilla Preetika Reddy
3: Miss Tokelau, Hela Tauhehe Teao
4: Miss Solomon, Tema Wickham
5: Miss Papua New Guinea, Christine Kaupa Aiwa
6: Miss Samoa, Susana Fanueli
7: Miss Cook Islands, Teuira Raechel Napa
8: Miss American Samoa, Eleitino Tuiasosopo
9: Miss Hawaiian Islands, Alesha Uluwehi Malaea Makuakane
10: Miss Tonga, Rosemarie Louise Fili
