O le uluai taimi lenei ua filifilia ai e le Faalapotopotoga Soka a Samoa se uluai tamaitai e avea ai ma se tasi o laufali toe tafu’a i le taamilosaga o le Ipu a le lalolagi i le taaloga o le Soka mo i latou e i lalo ifo o le 20 tausaga le matutua mo le itupa o tamaitai lea e talimalo ai Pale i Farani i le tausaga lenei.
O le tamaitai ia Maria Akenese Salamasina sa avea muamua ma se tasi o tamaitai lakapi toe fusu foi, ma sa filifilia foi muamua ma se tasi o sui taalo o le aulakapi a tamaitai o le Manu Sina, a’o lei liliu ai ma taalo i le taaloga lenei o le soka. E talenia tele lea tamaitai Samoa i le itu tau taaloga lea foi ua avea ai ma se tasi o laufali sinia o le faalapotopotoga soka a le atunuu, ma e valu tausaga talu ona avea ai ma laufali.
I se faatalanoaga ma lea tamaitai na ia ta’ua ai, na amata ona ia mafaufau i lenei avanoa o le laufali ina ua ia vaaia e le toatele nisi o le itupa o tamaitai Samoa e agai iai, faatasi ai ma le toaititi o le fuainumera o tamaitai o avea ai ma laufali i le taaloga lenei o le soka i Samoa lea e na’o le toalima lava. O se tasi o miti a lea tamaitai, o lona totoina ai lea o se fatu lelei mo si ana fanau i le lumanai. Ta’ua e Salamasina, o lona manaoga a uma atu lona vaitaimi ae matutua ane lana fanau, e manao ina ia talanoa si ana fanau, o le latou tina le uluai tamaitai Samoa na filifilia mo taaloga soka faavaomalo i le vaega o laufali.
Fai mai Salamasina, soo se miti lava e iai ona lu’itau ma e iai foi lona talitonuga o le ausia ai o lea miti mo ia, sa tele nisi o lu’itau na la faafeagai mai i le tuanai aemaise o le taimi o ana toleniga e amata mai lava i le Aso Gafua seia oo i le faaiuga o le vaiaso. E oo foi i le lagolago a lona aiga na faafetaia foi e lea tamaitai ona o lona manatu, ana leai le lagolago a lona aiga semanu e le tau lau o lona faamoemoe o iai nei.
Ta’ua e Salamasina e iai taimi e faavaivai ma paie ai i ana toleniga peitai e faamalosiau atu lava lona aiga ina ia faamalosi ma finau pea. O isi taimi o le taeao e tatagi ai lana telefoni mai ona mātua ua valaau atu e tatau ona alu e faatautaia ana toleniga. O lana faiaoga numera tasi mo ana toleniga, o lona toalua lea e le gata i soo se taimi o le aso ae oo lava foi i le taimi e na te faatautaia ai soo se taaloga soka, o lona toalua lava e faamalosiau atu ia te ia.
O le lu’itau a lea tamaitai mo soo se tamaitai Samoa ina ia faamalosi ma finau pea pe afai o iai se miti o taumafai ina ia ausia ai i le lumanai, poo le aoga, taaloga e mafai lava pe a tuu uma iai le loto. Ua faamauina nei i le talafaasolopito o le taaloga a le soka i Samoa le filifilia ai o lea tamaitai e malaga atu e faatautaia ai taaloga soka mo se tasi o taamilosaga tele a le lalolagi.
O le naunautaiga lava a le faalapotopotoga soka a Samoa ina ia toe maua ai nisi tamaitai Samoa e filifilia ai i le lumanai mo ni taamilosaga tetele faapenei. Saunoa le sui sooupu o le soka a le atunuu, ua matua talafeauga lava le avanoa o le a malaga ai Salamasina ona o lona galue malosi ai i soo se taimi i le faafoeina o taaloga a le faalapotopotoga.
