Na auai le ‘au Aau Olimipeka a Samoa i taaloga a le XII Oceania Swimming Championship i Papua Niu Kini.
E toatele le ‘au na auai e iai Brandon Schuster, Sitivi Sooa’emalelagi, Jelani Freesir-Wetzell ma Lushavel Strickland. O le ‘au lenei o le a faamoemoe iai Samoa mo ni pine i taaloga a le Pasefika i le tausaga fou.
O le tuuga muamua o le 5 kilomita i le sami (open water) na tu fa ai Sooa’emalelagi o Vailele. Ae na maua e ia le Pine Auro o Atumotu auā o ē na tini 1-3, o tagata aau mai Niu Sila (NZL) ma Ausetalia.
E fai si saoasaoa tele o lana taimi e 1hr 04minute, e telegese laititi ifo lava i le matati’a a le Pacific Games ei lalo o le tasi itula i le mamao lea.
O le mae’a ai o le tuuga lea na amata ai loa ma tuuga i le Swimming Pool i Port Moresby na tauva ai Strickland, Freesir-Wetzell, ma Schuster.
O le Pine muamua na maua o le Siliva a Lushavel Strickland, na tu lua i le 100 mita backstroke. O le tulaga foi lea na maua e Freesir-Wetzell ma ausia ai le matati’a fou mo 15 tausaga i lalo.
O le isi pine na maua i le aso muamua o le Pine Auro a Atumotu na faamanuiaina ai Brandon Schuster i le 200 mita aau freestyle. E pei o le pine a Sooa’emalelagi o ia o le tagata atu motu na muamua tini, ae na tu 1-3 NZL ma Ausetalia.
I le fu’a na tausinio Schuster ma Vernon Wetzell Jnr faatasi ma Strickland ma Jelani Freesir-Wetzell mo le tuuga e fefiloi ai alii ma tamaitai, na taumafai ai Samoa e malo i le ‘au a Fiti peitai e lei mafai.
O Fiti na mua i le lima sekone i le ‘au a Samoa.
O le aso lona lua o fe’ausiga na maua ai Pine Siliva a Strickland i le 50 mita backstroke ae tu fa Freesir-Wetzell ma maua ai lana Pine Auro a Atumotu. Pine Siliva foi ma Schuster i le tuuga o le 400m IM (individual medley – e fa aau e fesuiai).
I le 100 mita freestyle na tausinio ai Strickland ma Freesir-Wetzell ma toe maua ai foi a la pine.
O tuuga foi nei na tata’e ai e Freesir-Wetzell le matati’a a Samoa sa iai.
A’o le aso lona tolu na amata ai loa ona lagona le tiga o tino o le ‘au aau.
O tuuga o le aso lea na aau ai Wetzell i le 50 mita breaststroke. Maua e Brandon Schuster le Pine Auro a Atumotu mo le 400m freestyle, toe liliu ane aau i le 200 mita ma maua ai e ia le Pine Siliva a Atumotu. Ae o le aso foi lea na toe aau ai Sitivi Sooa’emalelagi i le 100 mita Butterfly.
I le 200 mita backstroke o Strickland na mauaina le Pine Auro a Atumotu i le 200 mita backstroke. Ae na faaiu le aso lona tolu i le isi Relay poo le Fu’a a Tama, na tu fa le fu’a a Samoa, ae tu tolu PNG. O Fiti na mua.
O le aso mulimuli na faaopoopo ai Pine a le Team Samoa. Toe maua le isi Pine Auro a Atumotu e Sooa’emalelagi i le 200 mita butterfly ma toe faatu ai le matati’a fou mo Samoa na aveesea ai le 6 sekone mai le matati’a tuai. Na faaiu le taamilosaga i le Fu’a Medley Relay 4 x 100 mita.
I le aotelega o le taumafaiga mo le ‘au a Samoa, e 33 tuuga na ulufale ai ma maua ai Pine e 12.
E 11 matati’a fou a Samoa na toe faatu, ma taimi Personal Best e sefulu ma le tolu na maua.
O se tulaga lelei tele mo le Team Samoa a’o tapena atu mo taaloga a le Pasefika i le 2019.
