E toatolu le vaega o leoleo mai Samoa o le a malaga i se taimi lata mo le atunuu o East Timor e faatino tiute o le tausia o le filemu i lea atunuu i lalo o Malo Aufaatasi.
O loo filifilia ai se tasi o leoleo sinia o loo umia le tulaga o le Suparenetene le susuga Papalii Tusimona faapea se alii leoleo faamaonia (constable) faatasi ai ma le susuga Papalii Lorenese Neru sa avea ma Komesina o le Matagaluega o Leoleo ma Falepuipui ae na faamuta lana auaunaga i le tausaga na tea nei ina ua mae‘a lana konekarate.
Ua faailoa mai e se molimau faatuatuaina le mae‘a ona ioeina mai e le vaega o le tausia o le filemu a Malo Aufaatasi le filifilia o Papali Lorenese mo le faia o ia tiute tāua.
O le ofisa o le va i fafo o le Malo o Samoa na faailoa ane i ai lea faaiuga ma tuuina atu ai i le Minisita ma le faauluuluga o le Matagaluega o Leoleo ma Falepuipui. O loo iai le fuafuaga o le a tauaveina e lea tamalii sa avea ma Komesina o le matagaluega le tulaga o se Konesale poo se Consultant peitai na faaalia e se molimau mai le ofisa autu o leoleo e lei faamautuina lea tulaga i le taimi nei.
O le avea o Papalii Lorenese ma se tasi o lea au galulue mai le ofisa o leoleo mo le tausia o le filemu, sa malaga ai foi se tasi o tamalii sa avea ma Komesina Lagolago.
O le malolo litaea ai o le afioga Tuitoga Poe Ualesi mai lea tofiga na filifilia ai foi e malaga i East Timor o se Konesale faatasi ma nisi o alii leoleo mo tiute lava o le tausia o le filemu. O lona uiga o loo talia ma le fiafia e Malo Aufaatasi le tomai o i latou sa avea ma leoleo.
E toatolu isi leoleo mai Samoa o loo faia ia tiute i Timoa i Sasa‘e poo East Timor, ma o le a foi i Samoa pe a taunuu atu le isi toatolu. E 12 masina o le a galulue ai le vaega ua filifilia mo ia tiute ma ua faailoa mai e se molimau, e tutusa lava faamanuiaga tau tupe o loo maua e leoleo e tofia mo ia galuega ma faamanuiaga e maua e i latou sa galulue faaleoleo ae tofia mo tiute o le tausia o le filemu i lalo o pulega a Malo Aufaatasi.
O faamanuiaga tau tupe o loo maua e leoleo mai Samoa i le faia o ia galuega, ua molimauina le maua ai o nisi faamanuiaga faaopoopo mo i latou auā e lelei seleni e maua, ma e totogi foi i tupe Amerika. O nisi ua faatau taavale, ma faatau nisi o mea aogā mo le aiga.
O le mafuaaga foi lea e tausinio uma ai alii ma tamaitai leoleo e maua lea avanoa, ma e maua ai foi se isi aoaoga tāua mo le faatinoga o o latou tiute faaleoleo pe a taliu mai i le atunuu.
