O le maliu o se tina matua o le afioaga o Vaimoso i le vaiaso na tea nei ua laga ai nei faitioga a le afioaga o Vaimoso, le afio i le afioga i le Tama a le Fale, le Matua ia Patauave, ma le la toalua igoa matua o Toomaagauaune ma Manuleleua ma o la aiga.
Ua faasaga se faaseā i le Malo ona o le lē toe mae‘a ona fausia o le faalautelega o le alatele lea ua tau masina o faatautaia ai galuega i le afioaga i le agai i le taulaga o Apia.
O le faamatalaga a le sui o le afioaga i le fonotaga a tusitala i le faaiuga o le vaiaso ma le sui o le afioaga o Aulavemai Tafito – o lea ua mae‘a le galuega tele o le faalautele o le auala i Vaimoso, ua mae‘a foi ona faatino le toe faaleleia o autafa o le alatele peitai o lea ua tulai mai le faalavelave lea ua maliu ai le tina e suafa ia Pina Leaututu Ifale e 85 tausaga le soifua.
O le tina na agai mai i lona aiga sa i le isi itu auala na taia ai i se van na agai mai i le taulaga agai i Vaiusu.
O le tina na taia ma maliu ai ma o le vaveao o le Aso Tofi na faatautaia ai le ifoga a le aiga lea e faapea lipoti e ana le taavale na lavea ai le tina. O se taavale a se aiga mai Vaiusu.
O le mau a le afioaga o Vaimoso ana mae‘a atoatoa le galuega ma faamalosia loa le fausia o ni kolosi i lenei itu o le alatele, ailoga e tulai mai le faalavelave ua maliu ai lenei tina matua.
O le molimau a le afioaga ua pei o le motorway i Aukilani lea nofoaga ma ua le tapasa lava le saoasoa ua feoai ai taavale i lea itu o le talafatai o Apia. Ua aveese uma foi patupatu sa iai e faamalosia ai le feoai o taavale.
O le iai foi o le Kolisi a Sagata Maria i lea afioaga ua taua ai le moomia tele o kolosi ina ia mafai ai ona tuuitiitia le soona o o taavale i lea nofoaga.
O le tali a le Matagaluega o Galuega ma Galuega Tetele a le Malo, o lea ua mae‘a le vaega muamua o lenei galuega toe faalelei o auala, ae e ese foi konekalate latou te vaaia kolosi ma o loo faatali le konekalate e faatautaia lea galuega.
Talu mai le faaiuga o le vaiaso ua tuanai ua iai nei ni faailo ina ia fautuaina ai avetaavale e tau tuutuu ifo lemu le soona o o taavaleafi i luga o lea alatele a o tālia ai se kamupani o le a faatinoina le galuega o le valiina o kolosi i luga o lea alatele.
O le vaiaso nei ua fuafua e faatautaia ai toe sauniga o le tina ia Pina, o se tasi o tagata matua o le afioaga o Vaimoso.
