E lē faigofie le filifilia o faauluuluga o Matagaluega a le Malo e pei ona faailoa e le afioga i le Palemia, Susuga Tuilaepa Lupesoliai Sailele Malielegaoi, ina ua ia faamaonia le filifiliga o nisi o Pule Sili fou mo le Matagaluega o Faamasinoga ma Mataupu tau Faamasinoga faapea le Matagaluega o Aoga, Taaloga ma Aganuu.
“O le susuga Papalii John Taimalelagi ua tofia e tauaveina le tulaga Pule Sili o le Matagaluega o Faamasinoga, ae o le faletua o Caroline (Karoline) ua avea ma faauluuluga fou o le Matagaluega o Aoga, Taaloga ma Aganuu”. O le saunoaga lea a Tuilaepa ina ua fesiligia i le feiloaiga ma tusitala i lana polokalame muamua o le 2AP ma le Palemia i luga o le leitio o le siufofoga o Samoa i Mulinuu i le Aso Tofi ua mavae atu nei.
O le faatoa aumai lea o se faamaoniga aloaia mai le taitai o le Malo o nei tofiga ina ua tuanai le tausaga ua mavae 2015 sa faasalalau ai avanoa mo ia tofi Pule Sili. Na faaalia e le Palemia o le toe tofia o se faauluuluga o le Matagaluega o Aoga ona ua faamavae le afioga Matafeo Falanaipupu Tanielu Aiafi, ona ua sauni e tauva i le faigapalota a le atunuu i le masina o Mati. O le Matagaluega o Faamasinoga sa tauaveina e le tofa Masinalupe Tusipa Masinalupe lea na toe faasalalau le tulaga Pule Sili ina ua mae‘a le tolu tausaga o lana konekarate. Sa toe talosaga Masinalupe peitai o lea ua manino mai nei ua lē toe filifilia, ina ua tulai mai le susuga Papalii John Taimalelagi o se tasi o Pule Sili lagolago o le Matagaluega o Faamasinoga.
O le tofa Masinalupe ua savalia le 15 tausaga o avea ma Pule Sili o lea matagaluega ae ua iai le talitonuga ua silia i le 30 poo ua lata foi i le fāsefulu tausaga o galue i le Matagaluega o Faamasinoga. O ia o se tasi o Pule Sili pito umi lona taimi galue i lea tofiga. Na faaalia e le Palemia e faigata le filifiliga o faauluuluga ona o le tulaga maualuluga o faailoga ma le agavaa aemaise e manifi lava nai vaega e maualuga teisi ai maka o le isi i le tasi oi latou e talosaga i ia avanoa.
O nisi lava foi o filifiliga a tuuina atu i luma o le Kapeneta e toe fai ai lava le isi faaiuga pe afai ua silasila atu le Kapeneta i ni faaletonu ua tatau ai ona fai se suiga. O le faaiuga o le masina nei o Ianuari 2016 o le a faatoa mae‘a ai le taimi galue o le tofa Masinalupe Tusipa ona amata ai lea o le nofoaiga a le susuga Papalii John Taimalelagi o le Pule Sili.
O loo faatali nei le Kapeneta i le taimi e tuuina atu ai ni lipoti i filifiliga mo le avanoa o le Loia Sili ma le Faatonu o le ofisa fou o le Director of Public Prosecution. Faaalia e Tuilaepa o le taimi e oo atu ia lipoti ona silasila lea i ai o le Kapeneta mo sana iloiloga ma faia ai se faaiuga. O lona uiga e lē o iloa le taimi e faia ai se faaiuga ma se filifiliga. O le afioga Aumua Tuatagaloa Ming Leung Wai o loo avea nei ma Loia Sili a le Malo.
