Ua tomatauina tapenaga a fanau e to‘a 54 o le atunuu ua faamanuiaina i avanoa sikolasipi o lenei tausaga fou i fautuaga ma timaiga mai le taitai o le Malo le afioga i le Palemia susuga Tuilaepa L Sailele Malielegaoi, ua tuusa‘o ai lagona i se gagana faigofie ina ia malamalama ai fanau o le a tuua le atunuu. “Ia outou iloa ma silafia a faaletonu la tou amio ma lē manuia le tou taumafai, e tou te foi mai na o le aifafasa le mea tou te maua”.
O le alii Palemia o le taitaifono o le Komiti o sikolasipi, na saunoa i le feiloaiga masani a le Malo ma fanau sikolasipi i se sauniga ua faia pea i amataga o tausaga taitasi i le naunautaiga o le Malo e maua se avanoa e ave ai se upu faufautua ina ia manuia aoaoga o le a feagai ma fanau.
O le to‘a 54 ua faamanuiaina ua fā‘ia mai le tumutumu. O i latou ia mai le limaselau ma ona tupu o fanau i le vasega faavae o le Iunivesite Aoao o Samoa. O lona uiga e lē oo i se ‘afa o lea numela o tamaiti i latou ua maua togi pito maualuga e talia ai i avanoa sikolasipi.
“Ia toe iloa lelei foi o le toatele o le aufaigaluega a le Malo o laui‘a sa aoaoina foi e pei o outou i Iunivesite i fafo, e poo le ā lava le toe amio e fai e iloa lelei ei latou auā ua foi mai ai”. Na faailoa e le Palemia le tāua o le ola finafinau i aoaoga auā o le faamoemoega o le Malo o taitai aoaoina lelei.
Peitai na ia faamanatu foi i fanau e leai se aoga o le tele o ni faailoga fomai ma nisi faailoga e ausia e se tasi, ae leai se faamaoni i le faatinoga o ona tiute.
O le gasegase lea ua molimauina pea i nisi o alo ma fanau e foi mai ua manuia aoaoga, ua maualuga le aoaoina ma faailoga ua maua ae faaletonu lava ona o le lē faamaoni. O le saunoaga a le Palemia na ia faailoa ai se atugaluga o le Malo i taiala ma aiaiga o sikolasipi a Niu Sila ua faatāua ai le tatau ona aulia e le tama ma le teine sikolasipi o tausaga e 18 ona faatoa amata lea o ana aoaoga i se iunivesite.
O nisi o fanau a Samoa e faamanuiaina mo ia avanoa ae e lei atoa lea tausaga ma na saunoa Tuilaepa ma ia faailoa o nisi lava fanau e uma le semester lona lua poo le tausaga atoa e lei amataina lana sikolasipi ona e lei atoa le 18 tausaga o le matua.
O le tatalo ma le tuualalo lea a le Palemia i le sui o Niu Sila i Samoa ina ia tagai ane i lea tulaga ua faaletonu ai le taumafai o nisi fanau. O lana faaaliga foi o le a ia toe tuliloa le mataupu lenei i le Malo o Niu Sila i se taimi lata mai.
Sa fesiligia le sui Komesina o Niu Sila i Samoa ma sa fai ma sui o le Hai Komesina i le sauniga i se faamatalaga e tusa o lea mataupu. Peitai sa lē mafai ona ia saunoa mai ae o lana faamatalaga e ese le vaega o le tautua a le ofisa o loo nafa ma sikolasipi oi latou tonu ia e ave i ai le fesili.
O le a tuliloaina le mataupu lenei i le isi a tatou lomiga o lumanai.
