Filifilia Fereti Saaga Jr mo le aufili Ausetalia

O le solo atu a tamafanau Samoa i totonu a aufili a Ausetalia ua faatupulaia ma a o ulufale atu o le alii o Fereti Saaga Jr i le aufili a Tamaaoga Ausetalia na matuā faafiafiaina ai ona mātua le susuga ia Rika Saaga mai Alafua, Malua ma Satapuala faapea le tina ia Sefulu mai Lufilufi.
Na malaga mai nai ona aiga mai Melepone faapea Suva i Fiti o loo alala ai auā le molimauina o lana taleni i le tauvaga a aufili aoga na faia i Knox Grammar i Sini nei, lea sa tausinio ai Fiti, Niu Sila ma Ausetalia.
E mataina lea taaloga faaiu i le va o ‘au e lua a le Tasemane, ma e ta le malologa o sili Niu Sila 10-9. Ae peitai o le toe sefulu minute o totoe o loo sili Ausetalia 16-10 ae toe sikoa loa Niu Sila i le tulimanu ova ma le kiki na manumalo ai 16-17.
O Fereti Saaga e taalo i le tulaga o le pou(prop) ma o isi tama Samoa e toafā i totonu o le aufili e aofia ai Pat Toeta, Faape Satiu, Jason Tomane ma Ahmu Lealiifano. E pei o nei ‘au e lua o loo matauina ai nisi o tama talavou e avea ma sui o le Wallaby ma le Olopeleki i tausaga o i luma.
E ui na malolo Ausetalia ae na faafiafiaina le tapuaiga aemaise le aiga o le alii o Fereti. Na masii mai le tuafafine o si ona tamā ia Rika mai Fiti, ia Dr Rosa Saaga Banuve ma lona alo ia Peni mai Melepone sa faapea ona malaga mai ai lona tamā ia Rika Saaga lea foi sa taalo i le ‘au malosi a SCOPA faapea le Manu Samoa A. E lē gata i nai ona mātua ae sa faapea foi ona masii mai le tuafafine o si ona tamā e tapuia ona faiva, ia Lilomaiava Flo Saaga mai Melepone ma Maria Toalepaialaii ma le fanau i Erskine Park Sini.
O se aso faagalogata auā e lē gata i le pipii o le taaloga ae na atagia ai foi suafa iloga o isi tama Samoa sa taaalo mo Niu Sila e pei o Nathaniel Apa le alo o le susuga Luafala Niko Apa.
E talitonu o le taufao o le taaloga na molimauina o le a faaauauina atu mo le lumanai pe a toe fetaui i latou nei i isi laasaga maualuga o le taaloga.
I isi taaloga muamua atu na faateia ai e Fiti Niu Sila e 22-20 ae manumalo mataina Ausetalia 31-7 a Fiti.