O le lata i le luasefulu tausaga o le asosi poo le faalapotopotoga o alii ma tamaitai sa tautua ma galulue i le Matagaluega o Leoleo ma Falepuipui (Samoa Former Police Association) ua tulai mai ai mo le taimi muamua se tamaitai e tauaveina le taitaiga o le faalapotopotoga i le tofi pelesetene.
O le faletua o Ana Schmidt ua 67 tausaga o lona soifua ma o se tasi o sui tamaitai sinia o le asosi a leoleo tuai ma ua tele tausaga o galue i le faalapotopotoga.
O se tina e silafia uma e le toatele sa galulue i le matagaluega o leoleo i tausaga ua mavae. O le taimi o avea le afioga Lavea Lio ma Komesina o leoleo faapea le susuga Sir Angus Sharp sa auauna ai Ana i le Malo i le avea ma leoleo o le Malo.
O le vaitau sa galue ai e lei toatele ni tamaitai sa avea ma leoleo. O tamaitai uma sa galulue i lona taimi sa fulisia o latou tiute i galuega i le ofisa. O ia o se tasi o toe ulutaia o lo latou vaitaimi i le matagaluega o leoleo ma falepuipui.
E tele tala mālie o na taimi e faamatala e le tina ona o lea vaitau i le galuega faaleoleo, sa leai ni faaletonu ogaoga na tutupu ai, e lē pei o nei aso ua tele faaletonu ua aliali mai i le faatinoga o galuega a leoleo.
O le Aso Toonai na tea nei na faia ai le fono faaletausaga a le faalapotopotoga ma faia ai suiga tofi lea ua tofia ai e avea ma Pelesetene. Ua toaono ia te ia sui o le faalapotopotoga o tama ma teine tuai o le matagaluega o leoleo ua filifilia e pei ona sa amata faavae le faalapotopotoga ma uluai filifilia le afioga Lavea Lio Schmidt sa avea ma Komesina o leoleo ma Pelesetene.
Na sosoo ai ma le afioga i le Tamaaiga Tuimalealiifano Vaaleto‘a Eti Sualauvi II, faapea le afioga Saunoamaalii Sonny Schuster sa avea foi ma Komesina o leoleo i le tofiga pelesetene. O le afioga Tusa Misi Tupuola na sosoo ai i le tofiga ma sosoo atu ai le tofa Autagavaia Tipi Autagavaia, ae o lea ua pale mai mo le taimi muamua se tamaitai i le Pelesetene le faletua o Ana Schmidt.
Faaalia e le pelesetene filifilia e tele ni galuega o le a sagai atu i ai lana laulau fou mo le siitia pea o le faalapotopotoga i ana galuega fai mo ona sui auai faapea ni fesoasoani e tuuina atu i le Matagaluega o Leoleo ma Falepuipui.
