Fia fesoasoani mafutaga Apolima i Brisbane mo le maota o le galuega EFKS Apolima Uta i Samoa

E tusa pe tele le mau pili totogi ma le taugata o le soifuaga, ae a totō le fatu o le alofa i loto ma finagalo, e pei o le selo le tali manao auā e māmā se avega i le pulupululima faatasi.
E lē fesili ane poo le ā le ekalesia, ae tulai lava ma galue auā ua talitonu, e sili le manuia o lē na te foai i lo lē na te talia. Ua lē masino foi le tali manao o le mamalu o le atunuu pe a oo ina faatagisia mai le fesoasoani e ala mai nisi o ekalesia ma aiga i Samoa.
Na tuufaatasia alo ma tamafanau a le alalafaga o Apolima Uta i le po o le Aso Toonai  27 o Iulai, e ala i se faafiafiaga tele sa faataunuuina i le hall masani o po ula i Jacaranda Avenue i Logan.
O le taitaifono: Sa‘u Lemana Faalafi Lale faapea nisi o matai o loo lagolagosua i totonu o le mafutaga e pei o Sa‘u Tafeaga ma Sa‘u Matano aemaise o alo ma tamafanau a le nuu faapea paolo ma gafa.
O le naunautaiga o le mafutaga, o le fesoasoani atu lea i le fia fausiaina o le maota o le galuega i Apolima-Uta lea o loo galulue ai le susuga ia Rev Avele Utumapu ma le faletua ia Fatipule o le EFKS.
O le faaili mālie a le UBEC Boys sa faafiafiaina le po atoa, ma na o latou tauaaoina se seleni e tusa ma le $6,331.80.
E ui lava ina manaomia le seleni i totonu aiga peitai e ao lava ona agalelei atu ma talia le faatalauula mai Samoa, o le finagalo lea o tamalii ma failauga faapea le loaloa o le mafutaga o aumau i Brisbane nei.
O le fetalaiga ia Latū Pene sa fai ma Fofoga o le po.
Sa amataina i le manuia toe faaiuina i le fiafia auā sa malupuipuia lona faatautaia.