Ua lē nofonofo lelei nisi o tagata talitonu o le tapuaiga Isalama i le fia malaga i Samoa e faamalamalama ma faapupula le latou tapuaiga ona o se manatu o le failautusi o le Fono a Ekalesia Kerisiano Soofaatasi le susuga Ma‘auga Motu, ua tatau ona tapu le lotu Isalama i le atunuu.
O le finagalo o le failautusi aoao na faailoa i lipoti, ina ua faamanatu le limasefulu tausaga o le fono a ekalesia kerisiano ma saunoa ai le Palemia i le fuafuaga a le Malo e teuteu le faavae o Samoa. O se teuteuga o le a aloaia ona tuu ai i le faavae faaupuga, o Samoa o se atunuu e faavae i talitonuga ma aoaoga a le lotu Kerisiano.
E leai se finagalo o le Palemia na ta‘ua ai a mea o le a teuteu ai ma le vaega o le faavae e faasino ile saolotoga o lotu (Freeedom of Religion), pe sa saunoa foi o le a tapu le lotu Isalama. Ua na o se finagalo o le failautusi aoao a le fono a ekalesia kerisiano, ua mafua ai ona lagalagā ni manatu o nisi o tagata Mosalemi i Niu Sila ma Fiti.
Ua faailoa e ia manatu le malaga i Samoa e faia se mafutaga e valaaulia ai taitai o tapuaiga kerisiano ile atunuu e fetufaai ai i mataupu tau lotu ile va nonofo ma le tapuaiga Isalama. O le a faamalamalama ai foi le mau a tagata Mosalemi ia latou aoaoga ina ia malamalama ai taitai o lotu kerisiano i Samoa.
O se feiloaiga ma le taitai o le tapuaiga lenei i Samoa ile faaiuga o le masina na tea nei, le susuga Mohammad Bin Yahya poo le susuga Laulu Dan Stanley na ia faaalia ai, ua na o le Kolisi faafaifeau a le ekalesia Metotisi i Piula na valaaulia o ia e faia sana pepa i le tapuaiga Isalama.
Fai mai Mohammad Bin Yahya, na faafetai ane faiaoga ma aoao o le kolisi faafaifeau ona ua maua lo latou malamalama i le latou tapuaiga ina ua maua lea avanoa e lē maua ile tele o aso.
Na faaalia ai e le taitai o le Isalama i Samoa, e maumau pe ana faapea isi lotu kerisiano o le maua o se valaaulia e mafuta atu ai ile latou foi tapuaiga e fetufaa‘i ai mafaufauga i aoaoga ma talitonuga faalelotu.
Ua faailoa se finagalo o le taitai o le ekalesia Katoliko i Samoa ua ia lagolago ai ile finagalo o le Faaao o le ekalesia ile lalolagi, o le tāua lea o le femalamalamaa‘i o lotu ma tapuaiga e maua ai le filemu ma fealofani.
E leai se finagalo o le afioga ile Akiepikopo o Alapati Lui Mata‘eliga ile finagalo o le failautusi aoao o le fono a ekalesia ua ia faailoa ai le tatau ona tapu le lotu Isalama ma Samoa. Faaalia e le afioga Alapati o loo iai le sui o le Katoliko ile fono a ekalesia.
O le afioga ile Tiakono Katoliko le susuga Kasiano Leaupepe, o le sui lea o le Katoliko o loo seei nei ile tulaga taitaifono o le Fono a Ekalesia Kerisiano i Samoa.
