O le fuafua tatau o le faia o aitalafu a le Malo i fafo, o se vaega tāua ua silasila nei i ai le Minisita o Tupe, le afioga Sili Epa Tuioti i lana fuafuaga o le tala autu o le tupe mo le 2016 i le 2017. Tasi lenei o mataupu sa vevela i ai finauga mo le palota tele ua mavae a le atunuu i le va o le Itu agai le Tautua Samoa ma le Malo.
Ua faaalia e le afioga i le Minisita o Tupe. “E ui lava ina alagatatau le siitia o nogatupe e faatupe ai vaega sa faaleagaina e le afā o Eveni ma ua lē ausia ai nisi o matatia sa fuafuaina, ae o le mea moni e tatau ona toe fetuutuunai le faasoa.”
“Ua tatau ona tatou tapena nei mo a taeao ae aua tatou te nono pe aitalafu mai le lumanai o o tatou tagata. Ia tatou tapena faafafine toaga ina ia mauaa le tamaoaiga mo se lumanai mausali mo alo ma fanau a taeao”.
E faalagolago le tamaoaiga o le atunuu ile atinae o pisinisi tumaoti poo le private sector, e pei ona saunoa le minisita, o latou ia e taimua ile faagaoioiina o le atinae. O lona uiga e tatau ona galulue faatasi le Malo ma pisinisi tumaoti e unaia le atinae o le atunuu.
“O le sao tāua o le Malo o le fausia lea o se siosiomaga talafeagai e faavae i vaega e pei o le tatau ona avanoa pea tupe nono mo le atinae o pisinisi.” O le afioga Sili sa umia se tofiga maualuga i totonu o le Fono poo le Council a pisinisi tumaoti i Samoa, o se tofiga ua ia faamavae i ai ina ua avea ma faipule ma filifilia o se minisita o le Kapeneta.
O le fuafuaga tau tupe a le Malo i le uluai tausaga o le paeaiga fou a le Palemene ua fuafuaina ai le tatau ona fausia o se faavae mautu o le atinae o le tamaoaiga. Ua faaalia ai e le minisita, e tatau i tagata uma ona faia o latou sao i le faamalosia o le atinae ina ia mafai ai ona lava tupe maua e tua i ai le Malo e faatino ai ana galuega, ma tuuitiitia ai le faia o nonogatupe e fesoasoani e faatupe ai fuafuaga o se tala autu o le tupe a le Malo.
O se tasi o vaega tāua ua agai i ai lenei tala o le tupe muamua o le paeaiga fou a le palemene lona 16, o le faamalosia o taiala mo le puipuia o le soifua maloloina o le atunuu. O tapaa o le a siitia tau ile 5 pasene ma o le a siitia foi le tau o le avamalosi faapea ma le faia o se lafoga i luga o le tau o vaiinu ma meaai suamalie ma oloa tau taumafa e tele ai le masima.
Faaalia e Sili, o se fuafuaga ua matuā talafeagai ona o le faatupulaia pea o le numera o tagata o le atunuu ua aafia i gasegase lē pipisi.
