E tusa ai ma le tusi tofiga a le Koneferenisi Aoao Ekalesia Metotisi i le mae‘a ai o fonotaga masani ia Iulai 2011, ma le fesuiaina o le aufaigaluega ua atoa le ta‘i fitu tausaga o galulue i totonu o aulotu faasinoti, lea la e aofia ai le matagaluega i Kalaiesetete.
O le susuga i le Tausi Matagaluega Ale Palelei ma le faletua Meleina ma o la alo e toafā e tusa ua 21 tausaga o galulue tausi matagaluega i le sinoti Niu Sila i Saute (Taita & Pamasetone), e aofia ai ma le fitu o tausaga i totonu o Kalaiesetete. Ua siitia atu nei i laua e tausia le aulotu i Alaska i Amerika e tusa ma le finagalo o le Ekalesia Aoao.
Peitai la o se valaaulia faaaloalo mai le falelua i matagaluega o Addington (Rev Neru Tiatia & Makerita) faapea Hallswell (Rev Poasa Leaupepe & Saeni) ina ia auai atu le susuga Ale Palelei mo sana lauga faamavae ma taitaia le latou sauniga lotu i le Aso Sa mulimuli o Iulai.
Ae o le Aso Sa muamua o Aukuso sa lauga faamavae ai i totonu o le matagaluega Kalaiesetete lea sa fai ma ona aiga tu‘ofe i tausaga e fitu.
E faigofie ona faatalofa ae faigata tele ona faatofa. Vaaia le loimata maligi i le mafutaga ua tuua ae e pule pea le Atua i le fesuiaina o lana faatoaga ma molimauina foi pelega o aso taumavae faapenei e pei ona alo i ai le mamalu o le falelua faapea Kalaiesetete.
E tuua e le tausi matagaluega Kalaiesetete o avea ma taitaifono o le mafutaga a le aufaigaluega i totonu o le aai.
Sa ia taitaia le sauniga lotu faamanatu o le Tutoatasi o Samoa i luga o le leitio talu ai ua solofa malumalu tetele o le aai i le mafui‘e. Tau ia ina ia alofagia e le Atua faalaolao ala i le ea ma le vasa mo le siitia atu i le aulotu fou.
Feiloai Kalaiesetete ma lo latou tofi fou: Rev Salafai & Fou Mika
O le taeao segisegi Aso Toonai, 13 Aukuso na gafoa i maota Siulepa, ina ua faausu feu faiva a manaia o le afioga Laauli ma le afioga Ta‘iai, o ni taulaga tagata ua ofoina le soifua mo le finagalo folafola o le Atua.
O ni lupe faalele e to‘ala faaautama i ai le paia i le toafā o alii, le susū o Leiataua Lesa ma Leiataua Letaua, susū Mulipola ma Taupau, faapea le fetalaiga ia Futi ma Auapaau ma upu i lo latou fale Manono.
Tainane foi le mamalu i le pulelua, le fetalaiga ia Nuu ma Leatinuu faapea le nofo a pule ma upu ia Faleata. Aemaise o le paia maualuga auā le afio o le Ma‘opu Taulagi, afio Faaolotoi ma le aloalii, Alalaimalae ma alo o le Tuiatua, susū alo o Malietoa, le paia ia Salevalasi, Tupuola ma le matua o Tago ma Usoalii, le mamalu ia Fatialofa ma Auelua, Malielegaoi ma le faleatua ma upu ia Salefao.
O le susuga i le Tausi Matagaluega Rev Salafai Mika ma le Peresitene o le Auso, faletua o Fou na siitia mai le matagaluega i Otara e pei ona galulue ai totonu o le faasinoti i Niu Sila i Matu i ni tausaga se tele, ua matutua nai o la alo e pei o le alii o Michael Mika o loo galue faaloia i Invercargill.
O nisi o le mamalu o o la tauaiga na malaga mai Aukilani ma Ueligitone mo le taulaga osi, o le susuga Leiataua Lesa Niuapu, Afioga Taualofai Lolesio Leiataua, Alaifatu Fatialofa ma Mose Fatialofa ma Talifaaifo Luapule Taupau.
O le sauniga lotu i le malumalu sa taitaia e le tausi matagaluega Addington, Rev Neru Tiatia ma ia faamamafaina “lou tapenaina o nei auā se manuia mo a taeao”, o le susuga Rev Poasa Leaupepe sa saunia le tatalo.
Na faatumulia lea taeao ma mamalu i le afifio mai o le aufaigaluega, susuga Toeaina Tumama Vili (EFKS), Toeaina Talosia Vanilau (AOG), Toeaina Fitifiti Luatua (PIC-Aranui) faapea susuga tausi matagaluega ma sui o le faasinoti Invercargill, Dunedin, Ashburton ma le falelua, ae tainane le ma‘ave lasilasi o le atunuu na auai.
O le alii taeao ma le usu alele ina ua aofia ‘ava tāua o Samoa potopoto na fetalai ‘ava i ai le fetalaiga Talifaaifo Luapule Taupau, o le susuga Leiataua Lesa Niuapu Iosefo Faaui sa fai ma fofoga taumolimoli o aiga galua auā alofa molipo o le tausi matagaluega ma le faletua.
O le fetalaiga Taumai Leo‘o, le susuga Pau Lufilufi sa fai ma sui o le matagaluega ma le aofia e faafeiloai, mae‘a lea alo ‘ava i tulaga masani o le aganuu.
Faaaloaloga tauaaoina e aiga ga lua
Ina ua mae‘a le taumafataga tele o le aso, ona alo atu lea o le paia o aiga e lua e tusa ma pelega o le aso, e pei ona tauaaoina faaaloaloga maualuluga i le faatupu ma le faatamalii, sa faatofusia feoi o le Talalelei na auai ae tainane sui o le sinoti, aemaise le mamalu o malo usu faapea sui o ekalesia i totonu lava o Kalaiesetete.
Ua malie le papa i Ta‘ū, ua malie le faga i Lau i faaaloaloga tauaaoina mo le matagaluega, ma taape ai le fua manusina i lea afiafi ua tofu le tagata ma si ana i‘a. O le Aso Sa la o le uluai lauga a Rev Salafai Mika i lana matagaluega fou na ia saunoa ai mo se inati to “E manaomia le tatou savavali faatasi, e lē na o le savali faaopeopea ae savavali ma le Atua”.
